AIZAWL: Silk Samagra-2 Project hnuaia Farmers Training Serchhip Hmar veng YMA Hall-a District Sericulture Office leh Research Extension Centre, CSB, Aizawl buatsaih chu V. Zothansanga, Director, Sericulture Department-in a hawng.
Director chuan thu sawiin, “Eng kawng pawh ni se theihna leh thiamna a inang lo va, thiam vek leh hre vek a awm theih bawk lo va, chuvang chuan intathriama hmasawn zel turin training neih hi a pawimawh em em a ni,” a ti a. District office-in training a buatsaih chu lawmawm tiin silk pangang vulhtuten hlawk zawka an thar chhuah theih nan mi thiam zawkte zirtirna an dawn hian nasa taka a puih ngei a beisei thu a sawi.
Training hi hun hnihah then niin hun hmasa zawkah B. Lalchhuana, Deputy Director & Project Co-ordinator chuan Project (Purpose, action, goals) tih thupui hmanga zirtirna pein Lalthlamuana Pachuau, Sericulture Scientist chuan Pruning Schedule and quality cocoon production tih hmangin a zirtir a. Hun hnihnaah Janet V Sailo leh Remlalliani Zadeng, DSO ten zirtirna an pe bawk a ni.
Programme hi C. Liannghinglova, Sericulture Demonstator-in a kaihruai a. Baktawng, Bungtlang, Chhiahtlang, Hualtu leh Serchhipa farmer-te an tel a. Lawmsanga Fanai, Sericulture Inspector chuan lawm thu sawiin hun a khar a ni.