Mizo paliin Millionaire Farmer of India Award 2023 dawng

Aizawl: Mizo farmer paliin Millionaire Farmer of India Award 2023 an dawng.

Nilaini khan Pusa Ground, New Delhi-ah ‘Millioniare Farmer of India Award 2023’ semna neih a ni a. Mizoram atangin district palia kuthnathawktu – KB. Sangkhuma, Rabung, Khawzawl district; M. Hrangmawia Siata, Siaha district; VL Remruatpuia, Darlak, Mamit district; Vanlalfela N. Vanlaiphai, Serchhip district ten award hi an dawng a ni.

Award dawngtute hi Mizoram KVK-ten nomination an siam atanga an thlan chhuah a ni a. He program hi Krishi Jagran chhawp chhuah niin, Mahindra tractor ten an sponsor a ni.

Khawzawl district atanga he award dawngtu K.B. Sangkhuma hian sawhthing, fu leh silk pangang khawiah te hma lain, kum 2023 hian sawhthing quintal 70 lai chingin a tlem berah quintal 400-500 a thar beisei a ni.

Siaha district atanga dawngtu, M. Hrangmawia hian sial, bawng, vawk, kel, beram leh ar vulhin hma a la a, tunah hian sial hi a note nen 250 vel neiin, sangha dil lian tak tak panga atanga sangha tam tak thar chhuah leh a ranvulh dangte avangin he award hi a dawng a ni.

Mamit district atanga dawngtu, VL Remruatpuia hian zirnaa MBA a zawh hnuin bawng vulh leh sangha dilah te hma lain, a thar chhuahte atangin he award hi a dawng bawk.

Serchhip district atangin Vanlalfela hian sunhlu chi hrang hranga a sawngbawlna atangin he award hi a dawng thung.

Vanlalfela hian an khua-a sunhlu tam tak awm chu eng emaw taka siam chhuah theih a nih ringin theihtawp chhuahin a bei a, tunah hian sunhlu candy, sunhlu powder, sunhlu den leh sunhlu oil te siam chhuakin eizawn nan a hmang mek bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427