Aizawl: Mizorama Presbyterian Kohhran inkhawmpui lian ber, Synod Inkhawmpui vawi 100-na, Mission Kohhran Biak Ina neih mek chuan ‘Dan lova sumdawng tihrem dan kawng zawn’ rawtna chu bawhzui atan an pawm.
Mission Kohhran Biak Ina Synod Inkhawmpui neih mekah hian nimin khan rorel inkhawm tan a ni a, modertor thar, Rev. R. Vanlalnghaka kaihhruaiin rorel a ni a, presbytery pahnih, Aizawl Bethel leh Aizawl Hmar Presbytery atanga rawtna lut, ‘Dan lova sumdawng tihrêm dan kawng zawn chungchang’ chu pawmin SEC bawh zui tura tih a ni.
Tun tum inkhawmpuiah hian general agenda 37 awmin ni khatnaah agenda paruk zinga pang chu pawm a ni lo a ni.
Nimin rorel inkhawmah hian kum 2024 Synod Inkhawmpui programme leh puipa turte ngaihtuah ho a ni a, moderator atan Rev. R.C. Lalnghakliana pawm a ni a, Secretary (Sr.)-ah Rev. P.B. Mankima, Chhinga Veng, Secretary (Jr.) Upa Vanlalsawma Siakeng, Ramthar Tlang Veng; Finance Officers-ah Rev. VL Luaia Hranleh leh Rev. PC Pachhunga, Statistician-ah Rev. H. Laltlanthanga, Tlangnuam, Sr. Executive Secretary-ah Rev. C. Zorammawia leh Executive Secretary-ah Rev. Dr. K. Lallawmzuala te pawm an ni a. Kum 2024-a Pastoral Ministry thupui atan ‘Inpumkhatna’ Johana 17:11 (b) pawm a ni a, Pro. Pastor pawh mi 14 lak tura pawm a ni bawk.
Pastor bial thar panga hawn tura pawm a ni a. Chungte chu – Kolasib Tumpui Bial, Buhchangphai Bial, Darlak Bial, Bawrai Bial, Saipum Bial leh Delhi Bialte an ni.
Minister, pastor leh pro. pastor-te awmna tura pastoral-in ruahmanna a siamte chu inkhawmpui hian a pawm bawk.
Inkhawmpui rorel inkhawm hi Inrinni thleng neih a ni dawn a, Pathian zanah a tiak ang.