Aizawl: Siaha bialtu MLA Dr K Beichhua chuan, “Ei tur tha min petute kan do tlat chuan harsatnain min tlakbuak ang a, he ram hi a dam tak tak thei dawn lo a ni,” a ti.
He thu hi Dr K Beichhua chuan nimina BJP Mizoramin an party pisaa an MLA pahnihte lawmpuina inkhawm an buatsaihah a sawi a ni.
Dr K Beichhua chuan khawvela cheng mi nung, ni tina ei a, in a, e chhuak thin chuan a ei tur petu a hlauh a, a do tlat chuan harsatna tam takin a tlakbuak dawn a tih sawiin, “Do tur dik lo do tlat thinte chu an dam khawchhuak ngai lo. Ei tur tha min petute kan do tlat chuan harsatnain min tlakbuak ang a, he ram hi a dam tak tak thei dawn lo,” a ti.
BJP MLA chuan, “Mizoram mipuite hian hlauh loh tur kan lo hlauh thin avang khan kan va mawl tak em, kan tih hun hi a la thleng dawn a. Pathian leh mipui zara Mizoram MLA ka nih angin hlauh tur dik tak Pathian hi hlau zawk tur leh kan ram than lenna tur leh hmasawnna min pe theitu tur party lam hi i hawi tawh ang u,” a ti bawk.
BJP MLA K Hrahmo pawhin central BJP tha chakna hmangin Mizoram hi hma an sawntir dawn tih sawiin, “Mizote hian BJP kan hlauhna hi khua kan tlai hma hian paih thlak a hun tawh a, kan ram hian central tha chakna a mamawh a ni,” a ti a. Congress pawh tun hma chuan vai pawl, vai Hindu pawl tia sawisel ni thin mah se, term nga lai sorkarna an chelh zui thei tho a. Hetiang chiah hian mipuite hi an than harh hunah chuan kalphung dik tak leh system dik taka kalpui thin party hi Zoram mipuiten an thlan tur hmabak a la ni dawn tih a sawi.
Chhung inkhawm neih zawh hian BJP Mizoram state office kawt-ah INC leh a thawhpui, I.N.D.I. Alliance-te ‘eiruk duh lohna’ lantirna hun hman a ni bawk.