Nigeria striker Victor Osimhen chu African Footballer of the Year atan thlan a ni a. Mohamed Salah chu khumin he chawimawina hi a dawng.
Thawhtanni zanah Marrakech-ah Africa chawimawina sang hi sem a ni a. Hmeichhe lamah a hnempui Asisat Oshoala chuan chawimawina a dawng ve thung.
- A phu e
Kum 24 mi Osimhen hian season liamta khan league goal 26 khungin Napoli chu Serie A-ah a champion pui a. Hei vang hian a vawikhatna atan CAF chawimawina hi a dawng.
Napoli in kum 33 chhunga a vawikhatna atan Serie A title an lak chhan lian tak a ni a. Wolfsburg leh Lille striker hlui hi tun thla tir khan Italian Footballers’ Association Player of the Year atana thlan a lo ni tawh bawk.
Osimhen hi kumin Ballon d’Or thlannaah pariatna niin Nigerian mi top 10 a lang thei hmasa ber a ni a. Africa Cup of Nations qualifier ah goal nga khung tawhin kumthar a finals an khelh hunah an tlarhma atanga hmahruaitu a ni dawn.
“Ka suangtuah thin a tak ram a lo chang a ni a. Ka zinkawng a tel ve zawng zawngte chungah lawmthu ka sawi duh a. In mi puihna avangin tun dinhmun hi ka thleng.”
“Ka hnampui leh African zawng zawngte chungah lawmthu ka sawi a, ka tlin lohna tam tak karah in zarah mi hriat ka hlawh ve a ni.” a ti.
- Chawimawina dang
Nigeria leh Barcelona forward Oshoala in a vawi rukna atan Women’s African Footballer of the Year chawimawina a dawng a. Record thar a siam.
Inhliam in a tibuai chungin Australia leh New Zealand a World Cup-ah an ram chu round of 16 a hruai thleng a ni.
Nikum FIFA World Cup a beisei loh tana semi-final lut Morocco chu National Team of the Year a thlan an ni a, an manager Walid Regragui chu Coach of the Year a thlan a ni bawk.