Assembly inthlanpui an neih hnuhnung bera MLA nei miah lo, BJP chu Sikkim assembly-a eptu party lian ber an ni ta thut a, nimin khan Sikkim Democratic Front MLA 10 zetin an zawm thar a ni.
MLA rualte hian BJP working president J.P.Nadda chu hmuin a kaihhruai party hi general secretary Ram Madhav-a awm laiin an zawm a, Madhav hi BJP-in hmarchhak vil tura an dah a ni.
Madhav chuan SDF hian Sikkim-ah MLA 13 an neih thu leh an legislature party chuan BJP nena inzawm an duh thu an sawi tih a sawi a. “Sikkim hi BJP-in hmarchhaka sorkara telna a neih miah lohna, eptu pawh a neih miah lohna awm chhun a ni thin a. Tunah erawh chuan sorkarna siam pawh hlat lo tak a ni ta,” a ti a. BJP chu Sikkim-ah hian eptu tha tak, sorkar khalh ngiltu a nih tur thu a sawi bawk.
Ram danpui hnuaiah party pakhata MLA hmun thuma thena hmun hnih leh a aia tamin party dang zawm an duh chuan anti-defection law bawhchhiatna a awm thei lo va, hei vang hian tuna SDF MLA-ten BJP an zawm pawh hi danah thiam lohna an nei lo.