December 3 atanga Arunachal Pradesh-a Indian Air Force thlawhna, An-32 bo, a a tla keh darh an hmuh tak ruang ruang hlawm tura kal hmasate chuan a hmun an thleng tawh a; mahse, an beisei angin a mi phurh mi 13-te zingah dam chhuak an awm lo.
IAF chuan nimin khan an tirh hmasakte hian a hmun hi an thleng tih an sawi a. Heng mite hi Air force leh army helicopter thlawhna hmangin Nilainia phurh chhuah niin 15 an ni a, an zinga 8 chuan a hmun hi thleng hmasain thlawhnaa chuangte chungchang hi an sawi a ni.
“IAF chuan An-32 thlawhna chuang dam chhuak an awm lo hi pawi a ti tak zet a ni,” an ti a. Huaisen taka an hna thawka nunna chan tate zahna an hlan bawk.
An-32 thlawhna hi Jorhat, Assam atanga China leh Inrina, Line of Actual Control atanga km 15 chauhva hla, Arunachal Pradesh-a West Siang district, Mechuka-a tum tur a ni a. A thlawh chhuah atanga darkar chanve hnu hretah biakpawh theih loh a ni zui ta a ni.
Thlawhna tla taah hian a awmna chin hriat theih nan emergency locator transmitter bakah bungrua a phurhnaah emergency beacon dah a ni a, heti chung heng hmanraw pahnih hian signal engmah a pe chhuak lo a ni.
A tlak atang hian ni 8 chhung zet chu IAF hian anmahni leh mi dang puihna nen hmaraw hrang hrang – satellite, Navy ta specialised surveillance aircraft, mihring chuan ngai lo vansang atanga enna lirthei leh spy agency atanga Global 5000 surveillance hmangtein Soviet siam thlawhna hi an zawng a, khuain a bumro fo vang erawh chuan an duh angin an zawng thei lo va, a chin hriate hnenah Rs Nuai 5 pek an tiam bawk.
Mi-17 helicopter hmanga zawngtute chuan mi 120 emaw chauh chenna, Lipo khaw bula tlangram ft 12,000 zeta sangah hmuh a ni ta a. A tlakna hmun en chuan thlawhna hi a kang niin a lang a; mahse, IAF sipaite hi an dam chhuah beiseina a awm tho a ni.
Tun tuma thlawhna chesual hi kum 10 liam ta, 2009-a hetiang thlawhna tho, West Siang veka chesual nen a inang hle a. Hetah pawh hian mi 13 chauh chuangin tlang ft 12,000-a sangah hmuh a ni a, a chetsual hun pawh June thla bawk a ni.
Kum 2016 pawh khan An-32 thlawhna tho hi Chennai atanga Andaman & Nicobar Islands pana a thlawk chu Bay of Bengal chungah a chuang mi 29 nen an bo va, he thlawhna hi chu hmuh a ni ta miah lo nghe nghe a ni.
AN-32 tla taah hian Wing Commander G.M.Charles, Squadron Leader H.Vinod, Flight Lieutenant R.Thapa, Ashish Tanwar, S.Mohanty leh Mohit K.Garg, Warrant Officer K.K.Mishra, Sergeant Anoop Kumar, Corporal Sherin, Leading Air Craftsman S.K.Singh leh Pankaj bakah sipai anga chhawr loh hna thawk pahnih Putali leh Rajesh Kumar te an chuang