Aizawl: Bangladesh Zo hnahthlak leh Mizo Zirlai Pawl (MZP) hruaituten nimin khan chief minister thar, Lalduhoma chu a pisaah lawmpuina an hlan.
Bangladesh Zo hnahthlak hruaituten Chief Minister Lalduhoma chu a pisaah lawmpuina thilpek an hlan a. Chief minister hian Bangladesh Zo hnahthlakten duhsak taka an lawmpuina chu lawmawm a tih thu a lo hrilh.
MZP hruaitute pawhin chief minister chu a pisaah hmuin lawmpuina an hlan a. Hun reilo te chhungin kalphung thar hmuh nghal tura a awm chu, a bik takin zirlaite an lawm hle a, zirlaite ang bawkin mipuite pawhin an lawm hle nia an hriat thu sawiin, sorkar thar hmalaknaah te lawmthu an hrilh a ni.
Chief minister pawhin MZP-te chu an kal zelna turah duhsakna a hlan a, ram hmasawnna hnathawh kawngah a tul ang zela sorkar lo puibawm zel turin a sawm a ni.
MZP hruaitute hi Hrangturzo bialtu MLA Lalmuanpuia Punte in a telpui a ni.