Hun a thar a. Sawrkar thar kan nei a. Mipui pawhin hma lam pan kan beisei a. Hun kal tawha kan tih dik loh pawh tam tak sawi tur a awm ngei ang. Kan tihsual tawh a inzirin kan sawrkar thar chuan mipui tan tih tak takna thinlung nen hma a la turah beisei zel ila.
Hetih lai hian hun kal tawha kan tihsualte hriat nawn leh fo ngai a awm thin. Mipui hian eng kha nge an duh loha khati tak maia sawrkar dinglai an chak loh tih hi chhui kir ila. A hmasa berin mahni tana sum siam ringawt mai an buaipui kha nasa taka an tlakpui chu a ni. Chief minister atanga intanin duhsak zawng contractor leh supplier vulh lamah an tlan a. Mi zawng zawng hriat khawpin vai contractor, chief minisrer unaupa makpa chuan zoram titi ni khawpin contract a thawk a. Chutih rualin vai dang pakhat chu sumdawnna lamah a lo lar hle bawk a. Mizo contractor han lar leh deuh awmchhun pawh CM laina a lo ni leh a. Heng ringawt pawh hi mipui hian an kham takzet a. Minister te lah chuan consultancy firm hman thiam bik an lo nei far hlawm bawk. Anmahni party chhung ngeiah pawh induhsak hlei thei lo khawpin an duhsak bikte an voh a. Hetiang ang chi hi mipuiin an chhangkham zia hriain kan sawrkar thar hi chuan hleih neihna uchuak ang chi hi han ti ve miah lo se mipuiin an fak reng a rinawm. Sum ngainat hi sual tinreng bul tia bible in a lo sawi tawh ang khan sum bawih ata kan ram hruaitute hi fihlim sela. Chu chu mipui duh hmasa ni pawhin a lang.
Tin, kan ram hruaitute zingah consultancy firm nei, mahni hminga dah ngam lote, mahni unaute emaw, mahni thiante emaw hminga firm nei an awm fur pawh kha mipui hian an hai lova. A bik takin an party chhunga an thawhpui party workers ten an hre bel hle tih pawh hi sawrkar thar hotute hian hre ngei bawk se. Hetiang laka an fihlim lo anih chuan tuna duh taka thlang tlingtu mipui ngei hian archuktuilo khawpin an sel zui dawn ani tih hre tel ngei bawk teh se.
Mipuite hian sawrkar hi kan duh tui em em tawh a. Mla ah pawh rinhlelhawm deuh chu kan melh sa run ani tih hi hre nawn mawlh mawlh bawk se a tha ang. Kan buaina bul ber sum hi mipuite nena kar zau tak siamtu a ni a. Hemi hre reng a, mahni inhaivur lova, thinlunga ram hmangaihna nena ke an pen phawt chuan sawrkar hi thlak leh mai turin mipui hian an siam lem lova, hruaitu dik leh ram hmangaihtu hi chu thu neia siam reng pawh an duh dawn a ni. Sawrkar thar hi beiseina nen i hmuak phawt ang u.