Mizoram Legislative Assembly pakuana session hmasa ber ni thum awh chu a tiak ta a, nimina session neihah Kolasib biala ZPM ticketa thlan tlin, Lalfamkima chu chuhtu awm loin deputy speaker atan thlan tlin a ni.
Nimina session tan a nih veleh tun tum session leh session hnuhnung ber inkara member hlui boral, minister hlui, Lalbiakzuala sunna hun hman a ni a, speaker sawm angin House Leader Lalduhoma’n Lalbiakzuala chanchin a sawi a, hemi hnuah Leader of opposition Lalchhandama Ralte, Congress MLA C Nunglianchunga leh BJP MLA Dr K Beichhua te chuan an sun tak chanchin an sawi a, minute khat chhung ngawi rengin an ding chhunzawm a ni.
Hemi hnuah speaker chuan deputy speaker atan hun tiam chhungin mi pakhat chuahin hming a pek luh thu a sawi a, Champhai North bialtu MLA H. Ginzalala’n Kolasib bialtu MLA Lalfamkima chu deputy speaker atan a rawt a, South tuipui bialtu Jeje Lalpekhlua’n a thlawp a, mi dang hming pe lut an awm loh avangin Lalfamkima hi chuhtu awm loin tlingah puan a nih thu a sawi a ni.
Deputy speakar atana thlan tlin tak, Lalfamkima hi House leader Lalduhoma leh Leader of opposition Lalchhandama Ralte ten a thutna turah an hruai a, speaker sawmna angin thu tawi a sawi chhunzawm a, deputy speaker-ah thlan a ni chu lawmawm a tih thu leh a hna chu tha taka hlen chhuah a tum thu a sawi.
Deputy speaker thlanna neih a nih hnuah nimina Assembly House-a Larsap Dr. Hari Babu Kambhampati thusawi chungchanga lawmthu sawina motion, Champhai South Lt Col. Clement Lalhmingthanga’n a put lut chu sawiho a ni a, member 31-in an sawiho hnuah Speaker Lalbiakzama chuan tlai dar 4:22 khan ni thum awh session chu tiam chin awm loin a titawp ta a ni.