Chief Minister Lalduhoma’n SEDP zirtirtute chu sorkar kum kal mek a tawp thlengin chhawr zui an ni dawn tih leh Mizoram Subordinate Services Selection Board (MSSSB) chu tuna exam an buaipui mek an zawh hunah thiah a ni dawn tih house a hrilh.
Nimin Assembly sessiona larsap thusawi chungchanga lawmthu sawina motion put luh sawihonaah chief minister chuan SEDP zirtirtu leh MSSSB thiah tur chungchang hi a sawi.
House leader-in thu a sawi hma hian Leader of opposition Lalchhandama Ralte chuan thu sawiin, sorkar tharin ni 100 chhunga a hnathawh turah SEDP board thiah a tum a, hetah hian SEDP zirtirtu sang telin an tuar dawn tih sawiin, zirtirtute chu academics session kal laiah hian kaltlangtir hram dan a awm em tihte a sawi a, MSSSB thiah tum chungchang pawh sawiin, he board hi hna lak a kalpui tawh chu thalaite pawhin fair an titlang hle tih te, ni 100 chhunga thiah tumna hi ngaihtuah nawn leh turin sorkar a ngen tih a sawi.
Motion sawihona hmawr a bawknaah Leader of opposition thusawi chu House Leader Duhoma chuan chhangin SEDP zirtirtute chungchang chu cabinet-in a ngaihtuah tawh thu leh tun financial year tawp thlenga chhawr zui an tum thu an sawi a. Zirtirtute chungchang sawi zawmin, an zingah hian ‘unqualified’ tam tak an awm a, kal zel tlak loh an awm a, an post tur hmuna awm lo leh ai kal late pawh an awm tih sawiin, “Chuti chung chung chuan keini chuan financial year hmang zo rawh se kan ti a, an thawk zui ang a, a bak chu education minister-in tul a tih angin a kalpui turah kan ngai,” a ti.
Chief minister chuan MSSSB thiah chungchang pawh sawiin, “Tunah hian exam buaipui mek an nei a, an zawh fel hunah kan thiat ang,” a ti a. Sorkar kal tawhten MPSC an ring tawk a, hna lak buaipui turin an ring mai thin tih sawiin, political appoinment tih theihna remchang system thar kalpui chu tha an ti ve lo tih te, he board hnuaia hna lakah hian thil fel lo tam tak a lo awm tawh thu te a sawi a, sorkar hnathawk quality chu political appoinment avang hian a chhe thui tawh hle a, chumi siam that chu an tum thu a sawi bawk a ni.