Denver Nuggets star player Nikola Jokic chu NBA chanchina a zawna season sarih chhung season khata triple-double vawi 10 tal nei thei player hmasa ber a ni a. A team tan kawng engkimah innghahna ni lehin Brooklyn Nets 124-101 in an hneh.
Zirtawpni zingah Denver a Ball Arena-ah Nuggets hian Nets an mikhual a. Jokic hian point 26 score in rebound 15 leh assist 10 a nei a. Triple-double a neih vawi 115-na a ni.
Nuggets hi tunhnaiah a zawna vawi thum an chakna niin vawi 26 inkhelh atang vawi 17 an chak tawh a, Western Conference-ah pahnihna an ni mek.
Inhliam avanga tunkar a inkhel lo Jamal Murray chuan point 16 thawhin Payton Watson chuan point 18 Nuggets tan a thawh.
Denver coach Michael Malone chuan, “Nikola nen hi chuan hringnun hi a hahdam sawt thin. Player ropui a ni a, a tihtur hi awlsam tak hian a ti thei zel.” tiin a player a fak.
Inkhel dangah Minnesota Timberwolves chuan Dallas Mavericks 119-101 in an hneh a. Vawi 18 an chakna niin West lamah hmahruaitu an ni mek.