Brighton & Hove Albion forward Joao Pedro chuan huntawp dawn tawhah goal a khung a, 1-0 a hnehna an channa niin English club hian Europa League round of 16 an lut chiang.
Europa League ah hian group stage atanga round of 16 lut chiang turin group hmahruaitu nih a ngai a. Group a pahnihna ten team 32 inlanna tur play-off round an khelh a ngai dawn thung.
Seagulls hian knockout stage khel dawn chiang tawh mahse playoff round-ah UEFA Champions League atanga team tla thla te an hmachhawn thei dawn a, hei vang hianGroup B-ah Marseille aia sang zawk turin hnehna chan ngei an mamawh.
Amex Stadium-ah Ningani zanah Roberto De Zerbi pawlte hian draw result bak an sual chhuak thei dawn lo niin a lang tawh a. French club in group hma hruaitu nih an hnaih hman.
Mahse minute 88-naah Pedro-a’n Marseille penalty area chhungah ball a la a, fing taka thai remin hmunawl a insiam a, chakna goal ni tur a khung.
Pedro hi tun season-ah Europa League ah Brighton top scorer ni lai a ni a. Group match vawi ruk khelin goal ruk a khung tawh.
“Ka lawm a, hetiang hun hi ka hlim ber lai a ni. Europa League a goal khung hnem ber han nihte hian min ti lawm. Table chung ber a awm leh top scorer ni bawk tur hian rim taka thawh a ngai.” tiin Pedro chuan a sawi.
Brighton boss Roberto de Zerbi chuan, “Ka au nasa lutuk kha ka aw a chhuak tha thei tawh lo. Inkhel hautak leh hmuhnawm a ni a, football tha kan khel bawk. Table chung ber a awm nih hi kan phu a ni.” tiin a sawi ve bawk.
- Hammers pawh
West Ham United pawhin play-off round khelh pumpelh tumin an mamawh point an hmu a. Freiburg lakah harsatna lian tawk lovin an chak.
London Stadium-ah hian tling chiang tawh Hammers in pakhatna ni turin point khat bak an mamawh lova, first half-ah goal hnih khungin inkhel an dahtha.
Edson Alvarez-a ball pek dik zar zovin Mohammed Kudus chuan an goal hmahruai minute 14-naah a khung a. Mexico midfielder Alvarez hian halftime hma deuhin an goal hnihna a khung ve leh bawk a. Ajax atanga West Ham a pan hnua a goal hmasa ber a khungna a ni.
West Ham manager David Moyes chuan playoff khelh loh chu an tan a pawimawh hle tih a sawi a. “Kan khelh hmabak la awmte leh calendar awm dan avang hian pakhatna nih hi a pawimawh hle. Krismas dawnah kan inkhelh hnem avangin kan hah dawn viau a. Hunawl kan neih ve theihna tura inkhel awm zel tura thil an ti hi chu hriatthiam a har.” a ti.
- Tling tawh Reds an tlawm
Group E-ah Liverpool in hmahruaitu an nih chian tawh avangin team naupang tak an khelhtir a. An starting XI kum chawhrualin kum 22 leh ni 156 a upa an ni a, hei hi Europe huap inelna a a line up an neih naupang ber a ni.
Jarell Quansah chuan Mohamed Amoura leh Cameron Puertas te goal inkarah goal a khung a, 2-1 in Union St.-Gilloise chak tur an dal zo lo.