Australian Open champion Novak Djokovic chu beisei loh takin round hnihnaah a tla nghal teuh hle a, Alexei Popyrin laka a talbuai viau hnuah 6-3 4-6 7-6 (7-4) 6-3 in a chak hram.
Nilaini a Rod Laver Arena a inkhelah hian Melbourne a record a siam tawh pawtsei tura inlan Djokovic hian nidang a pha lo hle a. Vawi 10 a champion tawhna hmunah kheltha tawk lo viau in Popyrin-a’n beisei a nei viau hman.
World number one ni lai hian set hnihna a hloh hnuah set thumnaah vannei takin tie-breaker ah set a la leh a. Darkar thum leh minute 11 chhung inkhelah a tang tluan thei hram.
Round thumnaah Andy Murray hnehtu Tomas Martin Etcheverry nen an inhmachhawn leh dawn.
“Ka theihna sang berin ka khel lo, hei hi kei ngei pawhin ka chiang. Thil ropui leh danglam tak han tih ka nei lo. Set khat leh a chanve chhung chu player tha zawk a ni. Inkhel a kal rei deuh khan a inthlak danglam deuh a, tie-breaker hnuah khan boruak a inthlak danglam chauh a ni.” tiin Djokovic chuan an inkhel a thlirlet.
- Sinner a kheltha
Mipa singles inkhel dangah seeded number 4 Jannik Sinner chuan Jesper de Jong lakah chungnung taka chakin round thumna a lut ve bawk.
Margaret Court Arena a inkhelah kum 22 mi hian chak turin minute 103 chauh a mamawh a. A khingpui Dutch qualifier hi 6-2 6-2 6-2 a hnehin Daniel Elahi Galan leh Sebastian Baez te inkara chak zawk a hmachhawn leh ang.
Seeded number 7 Stefanos Tsitsipas chuan tualchhung player Jordan Thompson chu darkar thum leh minute 36 chhung inkhelah 4-6 7-6 (8-6) 6-2 7-6 (7-4) in a hneh ve bawk.