New Delhi-a cham mek Power & Electricity Minister F Rodingliana chuan Mizoram chu state dang nena khaikhin theih a nih loh avangin hriatthiamna nen DPR an theh luhte chu pawm turin Rural Electrification Corporation (REC) Limited Chairman & Managing Director Vivek Kumar Dewangan, IAS., a ngen.
P&E Minister F Rodingliana chuan Nilaini khan Vivek Kumar Dewangan chu kawmin, F Rodingliana chuan Mizoram chu state dang nen inanga khai rual theih a nih loh thu sawiin, “Zalenna sual avangin kum 20 zet rambuai niin hmasawnna kal mumal thei lovin a thuanawp a, tunah chuan India rama state ralmuang berte zinga mi kan ni leh tawh a, chuti chung chuan sum leh paiah kan la harsa em em a, sorkar hnathawkte hlawh pawh pe thei tawk tawk dinhmunah kan ding mek a ni,” tiin, state dangte aia tehfung thlah dul deuh turin a ngen.
Vivek Kumar Dewangan chuan Minister ngenna ngai pawimawhin, Utilization Certificate (UC) zaa 10 chauh department-in theh lut se, Revamped Distribution Sector Scheme (RDSS) bikah chuan second instalment a lo release tur thu a hrilh.
Hei bakah P&E Minister chuan modernization, smart metering leh loss reduction atana P&E department-in DPR cheng vaibelchhe 806 hu an theh luh chu a taka tihlawhtlin a tulzia sawiin, Mizoramin power za zela 33 chuang transforming loss a neih thu leh transfomer tam zawk za zela 72 lai chu kum 20 chuanga upa an nih tawh avangin, a tihchangtlunna tur DPR an theh luh chu pawmsak ngei turin a ngen bawk.
P&E minister hian Mizoramin harsatna a tawh thinte sawiin, “Mizoramah chuan kum khatah ni 130 chuang ruah a sur a, kan kawng dinhmunte avangin thil phurh man a toin hna thawh hun chhung a tlem phah a ni,” a ti a. REC chairman chuan MP inthlan zawhah Minister thu thlente tihhlawhtlin ngei a tum thu a lo hrilh a. Un-Electrified village/inhabitants (eng la luh lohna khua) a eng lak luhna tur DPR cheng vaibelchhe 144 hu theh luh tawh pawh pek ngei a tum thu a sawi bawk.
An inkawmnaah hian Arun Kumar Tyagi, Executive Director, REC leh Director dang eng emaw zat an tel a ni.