- Mahmuaka Chhakchhuak
September 2013 khan Microsoft chuan Nokia devices and services division chu lei an tum thu an puang a, April 2014 alo thlen leh meuh chuan an inlei fel ta a. Tichuan, press conference neiin Nokia Chief Executive Officer (CEO) chuan Nokia CEO a nih anga a thusawi hnuhnung ber atan thusawina neiin press mite hmaah chuan “Engmah tihsual kan nei lo, nimahsela engtin emaw tak chuan kan chak lo a ni” tiin a sawi a. Chu thu a sawi chuan a lung a chhe hle a, amah mai pawh ni loin Nokia company-a a thawhpui zawng zawngte ngei pawh chuan insum thei bik loin an thuthmunah an mittui alo far fap fap hlawm bawk a.
Nokia company hi kum 1865 daih tawha Finland-a lo din tan tawh niin kum 1980 vel atangin mobile phone lam pawh an buaipui tan a, kum 1990 atanga kum 2000 hma lam vel thleng kha chuan khawvela mobile company hmahruaitu hial an lo ni phak. Nimahsela an beisei loh leh an hriat phak hauh loin Nokia company chuan tlakchhiat lam alo pan hret hret a, a tawpah chuan an company hlun tawh tak chu hralh alo ngaih phah ta hial a. An company ngainat em em thin chu Microsoft chuan leiin kum 2014 atang chuan an lo mangtha dawn ta reng mai. Chu an company thlahnaah chuan “Engmah tihsual kan nei lo, nimahsela engtin emaw tak chuan kan chak lo a ni” tiin an tlakchhiat chhan a sawi a. An tlakchhiat chhan ber hi sumdawnna hi intlansiakna hmuna a tha a chak tawk loh vang a ni ber a, chutiang chuan khawvel inthlak danglam chak lutuk hi an company chuan a tawrh phah ta a ni.
Mithiamte’n chik taka Nokia company dinhmun a han chhui chuan, hetiang hi an hmuchhuak a; Nokia company hian thil inthlak danglam chak lutuk hi an zo lo a, anmahni an insiam rem hman lo. Zirna an hloh a, an thil siam chhuah leh hralh chhuahte chu a ngai renga kalpuiin thil thar danglam lo piang zel milin an company chuan insiam danglam ve chak lo tihte chu a pawimawh zual a ni a. Chu chuan sum tam tak a ken tel zel bawk avangin Nokia company chuan an sumdawnna chu a lo hlawk lo tial tial a, lohtheihloha hralh ngaiin an lo awm phah ta a. Tichuan, Nokia company chu Microsoft company-in a lei hnu atang chuan Nokia hming chu khawvel ata chhilh bo alo ni ta a, thawnthu ang maiin Nokia chu sawi alo ngai ta a ni.
He thusawi tawp ber hi company chungchang mah nisela mihring nunah ngei pawh a pawimawh hle mai a, nang leh kei atan ngei pawh infuihna atana hman pawh a tha viauin a rinawm. Leilung hi a vir reng angin a chhunga chengte pawh hi thil inthlak danglam a awm ve reng bawk a. A bik takin sumdawnna kawngah ngat phei chuan zankhat thilthua thil inthlak danglam hi a awm thut thut thin a ni. Chuvangin khawvel her ruala mahni pawh kan insiamrem ve zung zung a ngai a, chuti a nih loh chuan kan hlui vat mai a, sum leh pai lakluhna kawngah ngei pawh midangin min tlankhalh thuai mai thin. Entirna atan, Kan hriat tirh ata Zawngtah hi a to leh a tlawm chu thuhran nisela ziah lohin an zuar a, a leitute chuan an ziat mai thin. Tunah erawh chuan ziah sa lei tur a awm tawh a, tlemin lo to deuh zawk pawh nisela ziah chawp ngai ai chuan ziah sa chu hralh a kal zawk ngei ngei ang. Chutiang zelin Maian telah pawh runhmui emaw anthur tlemte hi an zep tel fo tawh thin a, chu chu a leitu tan a hlu em em a ni. Thingpui dawrah ngei pawh paratha leh mizo chhangban kan an chhawp dun ziah thin hi i hrethiam mai law’m ni?
Nokia CEO thusawi hnuhnung, “Engmah tihsual kan nei lo, nimahsela engtin emaw tak chuan kan chak lo a ni” tih hi keini pawh hian kan tlakchhiat chhan a ni ve thei reng mai tih hi ngaihtuah ngai tak a ni. Khawvel sorkar tin hian hei hi an hriat chian avangin an hnathawktute tan promotion an siam thin a, thlabiin hlawh siam mahsela an hlawh ngei pawh tipungin anmahni pawh chu dinhmun ngai renga awm loin hmasawnna turin ruahmanna an siam thin. Promotion hi awm lo sela chuan khawi sorkar pawh hi a tlu chhe rang ngawtin a rinawm a, a sukna ngaiah a sum reng mai ang. Mizoram sorkar ngei pawh chutiang kalphung ang chuan kalin Department thar a rawn piang fo a, Deparment hming te hial pawh thlak danglam a ni thin. Kum 1972 daih tawhah khan Mizoramah Agriculture Department hi kan lo nei tan tawh a, a huam chin leh a hmalakna pawh a zau thin viau. Zawi zawia hmasawn chho zelin kum 1993 alo thlen meuh chuan Horticulture leh Fishery-te chu Agriculture atangin an lo inlahrang thei ta hial a. Kum 2007 alo thlen leh tikah pawh Minor Irrigation pawh chu Agriculture atang bawkin an lo inlahrang ve leh a, chutah Agriculture Department pawh kum 2002 kum khan Directorate pahnih, Crop Husbandry leh Research & Extension te-a then darh niin kum 2020 kum khan Department pakhatah khung khawm (amalgamated) a lo ni leh ta.
Hmasawnna hi a kal chak kan ti dawn nge mihringte hian dinhmun ngai reng hi kan peih rei lo kan ti zawk dawn tih pawh hi hriatthiam har tak a ni a, patla khatah khai chuan dinhmun ngai reng chuan hmasawnna a thlen lo tih hi a buk a rit deuh mai thei e. Kum 1990 vela Shillong kalte kha kan han hmu sang viau thin a, khang lai vela Delhi kalte kha chu ngaisang tak kan ni. Tunah zet chuan Delhi tlang thleng thlengin zuk kal ve pawh ni ila kan thenawmte chuan ngaihsan enin min en tawh lo reng reng a, keini ngei pawh chuan Delhi kal leh Thailand kal chu thuhmun rengin kan ngai tawh chu a nih hi. Nakin lawkah chuan Mizo zingah hian Thlaa lawn pawh kan la awm ang a, a hmasa ber chu kan han ngaisang viau mai thei e, a hnu leh lamah lawn an awm tak zauh zauh chinah phei chuan thil danglam vakah kan ngai lo leh thuai maiin a rinawm. Chutiang chu mihring rilru a nih mai bakah khawvel danglam chak tawh zia tilang fiahtu pawimawh tak pakhat a ni.
Chawhmeh siam dan thleng pawh hian a danglam chak viau. Bean zai chhum hmawk hmawk hi tunhma lam zawnga kan kan dan a ni a, tunah chuan a sawl zawnga zaichhum kher hi kan uar ta. Thil ho tak emaw ilo ti ang e, a ho hauh lo a nia. Chawei dawhkanah zai chhum hmawk hmawk leh a sawl zawnga zai chhum chu han dah tlang la i hre mai ang. Chutiang zel chuan thil dangah pawh a ni a, zirna kawngah pawh Matric pass kan lawmpui viau thin kha tunah chuan a lo ni ta hauh lo a, Lirthei nei kan ngaihsan viau thin pawh chu tunah chuan alo ni ta hauh lo mai. Mihring lam indemna tur a awm lo a, hun inher danglam zel hian a herchhuahpui mai zawk a ni. Nokia CEO ngei pawh chuan kum 1865 daih tawha an company changtlung taka lo ding tawh a tlukchhiat theihna chhan chu “Engmah tihsual kan nei lo, nimahsela engtin emaw tak chuan kan chak lo a ni” tih zawng chu a ni mai a, ‘Eng emaw tak’ a tih hi khawvel inher ruala an inher rem ve zel loh vang a ni thei mai awm e.
I tan leh ka tan hian he thu hi a va pawimawh si em, keimahnia haichhuah tur thu thar leh danglam bik eng emaw tak a awm tawh loh chinah chuan tunlai tawng takin ‘Kan thing’ hle tawh tihna a ni ang.