- Ruata
Tata Motors chuan India ramin a nghahhlelh, Punch EV an tlangzarh a, Rs. Nuai 10.99 (ex-showroom) man atangin a intan dawn a ni.
Electric hmang lirthei huangah hian Tata Motors hi a hmingtha chho khawp mai a. An lirthei dangte pawh electric hmangin a chhuak chho zel a, an sub-compact SUV hmingthang Nexon electric version, Nexon EV pawh tunah hian electric hmang SUV-ah chuan India rama hralh hnem pawl a ni mek a ni.
Nexon EV aia tlawm tur an micro SUV hmingthang Punch-a electric version a awm ta hi thil lawmawm tak a ni a. India rama passenger lirthei hralh kal zuala lang chho deuh char char Punch model pawh a rawn ti hausa leh sawt a, lirthei leitute tan duhthlan tur a rawn ti pung leh ta a ni. India ramin electric lirthei lam a hawi chhoh mek laia lirthei te lam deuha electric hmang tha tak tak a chhuak chho hi thil tha tak a ni a. A company tan tak pawh market-a an dinhmun ti tha lehzual tu a nih ngei a rinawm a ni.
Tata Punch EV hi company lam chuan dealership hrang hrangah an pe chhuak mek a. He electric SUV hi book duh tan online leh Tata dealership-ah cheng 21,000 in a book theih a ni.
Tata Punch EV hi trim level 5 – Smart, Smart+, Adventure, Empowered, leh Empowered+ te a awm a. Battery pack duhthlan tur pahnih – 25kWh Standard Range leh 35kWh Long Range te a awm dawn bawk a ni. Long Range version-ah hian 7.2kW AC fast charger duhthlan tur a awm dawn a, Rs 50,000 chawi belh a ngai dawn thung a ni. Hei bakah hian sunroof duh tan pawh Rs. 50,000 chawi belh a ngai dawn bawk a ni.
Tata Punch EV Standard Range (25kWh) hi variant 5 – Smart, Smart+, Adventure, Empowered leh Empowered+ te awmin Rs Nuai 10.99 – 13.29 man inkar (ex-showroom) a ni a. Long Range (35kWh) version hi variant 3 – Adventure, Empowered leh Empowered+ te awmin Rs Nuai 12.99 – 14.49 inkar man (ex-showroom) a ni thung a ni.
Heng variant te hi front-axle mounted electric motor hmang an ni a. Standard variant, 25kWh battery pack hmang hian vawikhat charge full-in km 315 range a nei a. He electric motor hi petrol hmang te anga chhut chuan 82PS power leh 114Nm torque pechhuak thei anga chhut a ni. Long-Range thung hi chu 122PS power leh 190Nm torque pechhuak thei a ni thung a, 421km range a nei a ni. Punch EV hian charging option chi hnih – 3.3kW wall box charger leh 7.2kW fast charger te duhthlan tur a awm a ni.
Tata Punch EV-ah hian 50kW DC fast charging system, a battery 10 atanga 80 percent minute 56 leka charge thei duhthlan tur a awm bawk a. He e-SUV hian driving mode chi hnih – City leh Sport a nei a. Acti-ev platform nghahchhana duan niin, hei hi electric SUV lian ho – Harrier EV leh Curvv-ah pawh an hmang zel dawn a ni.
A kentel hrang hrang zingah chuan 10.25-inch touchscreen infotainment system with wireless Apple CarPlay & Android Auto, 10.25-inch digital instrument console, 360-degree camera, wireless smartphone charger, ventilated front seat, blind spot monitor, leatherette seat, air purifier, auto headlamp, rain sensing wiper, electric sunroof, leh thil hrang hrang a awm a ni.
Electric lirthei hi India pum huapin kan uar chho telh telh a. Sorkar khuahkhirhna avang te pawhin khawpui thenkhatah chuan lirthei neih ngei ngai a ni chho dawn ni te pawhin a hriat a. Helama rang taka hma la nghal pur pur mai Tata Motors in uluk taka an duan an electric SUV te hi hralh pawh a kal chho reng bawk a. Punch EV pawh hi an hralh nasat chhoh viau a beiseiawm a ni.