Illinois-a mi pariat thattu nia hriat thiin hmu

Joliet, Illinois, United States-a mi pariat zet thattu nia hriat chu Texas-ah dan kengkawgtute nen inbeih hnuah a thi tih police-in an sawi.

Joliet-a police-te chuan kum 23 mi, Romeo Nance-a hi Natalia, Texas-a thuneitute nen an inbeih hnuah a inkap hlum zui ta nia an hriat thu an puang.

Amah hi Joliet khawpui hmun eng emaw zata mi pariat thihnaa mawhphurtu nia hriat a ni.

A mi thah nia hriat zinga pasarih hi Thawhtanni khan inthenawm mai in pahnihah an ruang hmuh a ni a, pakhat hi Pathianni khan hmuh a ni tawh thung.

Ruang chhar a nih rual hian a titu zawn nghal a ni a, thuneitute chuan ‘ralthuam keng, hlauhawm tak’ a nih theih thu an puang.

Joliet police department-in thuchhuah an siamah Nance-a hi Thawhtanni zan dar 8:30 (India-a Thawhlehni zing dar 8:00) velah US Marshal-ten Natalia-ah a awm tih an hre chhuak tih an tar lang.

An hmuhna hmunah hian ‘Texas-a dan kengkawhtute nen an inbeih hnuah a handgun hmangin a inkap ta’ nia an ngaih thu an tar lang bawk.

“A mi thahte leh an thih dan hi Will County Coroner’s Office-in a enfiah mek a, chhui zui mek a la ni rih,” tiin an tar lang bawk.

A hmain Joliet police chief Bill Evans chuan Thawhtanni chhun dar 12:04-ah kah hlum ruang eng emaw zat hmuh a nih thu an dawng tih thuthar lakhawmtute hnenah a lo sawi tawh.

West Acres Road-a officer-te an thlen chuan ruang pasarih an hmu a. In pakhatah ruang panga leh a dangah pahnih hmuh a nih thu Will County Sheriff deputy chief Dan Jungles chuan a sawi a, an vai hian chhungkhat an nih hmel tih a sawi bawk.

Hetiang inthahna a thlen chhan hi hriat a la awm lo va; mahse, a titu leh a mi thahte hi inhmelhriat tha tak erawh an nih a rinawm tih a sawi.

Texas-a Nance-a hmuh a nih hma hian chhuitute chuan Toyota Camry sen a khalh niin an hria a, Chicago chhimthlang km 40-a hlaah pawh hmuh a niha hriat a nih theih nan thil thleng chu an puangzar nghal bawk.

A hma niin Joliet hmun hnihah inkahna a thleng bawk tih thuneitute chuan an sawi.

Thawhtannia ruang pasarih an hmuh nen a hma nia thil thleng pakhat zawk chu inzawmna nei niin an hria a, car number plate thuhmun hmuh a ni tih an sawi.

Inkahna pakhat zawkah hian thuneitute chuan mipa kum 28 mi a thi niin an sawi.

Police chuan Toyosi Bakare a nih thu leh Nigeria lam mi a ni a, kum thum chhung US-a lo cheng tawh a ni.

Police chuan hmun dangah mipa kum 42 mi kah a ni bawk a, ani erawh a nunna atana hlauhawm engmah hliam a tuar lem lo.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427