Aizawl: Mizo Zirlai Pawl (MZP) chuan Mizoram sorkarin zirtirtu ai kal lak titawp tura a hmalakna chu an thlawp thu an puang a, zirtirtu ai kal lak tihtawp kawnga chak taka hma la turin School Education Minister an ngen.
MZP General headquarters hruaitute nimina thukhawm chuan sorkarin aikal lak titawp tura a hmalakna an thlawp a, MZP pawhin zirtirtu aikal la leh mahni post loa awm te chu February ni 10 ral hmaa hriattir turin MZP Headquarters, Sub Headquarters leh Branch te an ngen a, February thla ral hma ngeiin hemi chungchang hi chingfel turin hmalak an tum a ni.
MZP chuan India leh Burma ramria zalen taka inkalpawh theihna, Free Movement Regime (FMR) thiah tumna awm chu Mizo hnam inpumkhatna leh inunauna tichhe thei tur a nih avangin a tawp thlengin dodal zel nise an ti a, Myanmar SAC sipaite chu Mizoramah lut tawh lo turin an ngen a,
Bangladesh Zohnahthlak Mizorama luh tum Central force ten an lo dan fo laia Myanmar sipaite zalen taka an ralthuamte nen awlsam taka ramri an kan fo chu tha an ti lo a, India sorkarin buaina siamtu ber Burma sipaite a ngaihsak em em leh duat taka an thawn kir fo chuan MZP mit a tikham hle tih an sawi a ni.