Dayana Yastremska in tennis khawvel a barakhaih chhunzawm zel a, kum 1978 hnua a vawikhatna ni turin qualifier khelh ngai a ni chungin Australian Open semi-final a lut.
Kum 23 mi Yastremska hian Nilaini khan minute 78 chhungin Czech tleirawl Linda Noskova chu 6-3 6-4 in a hneh a. Vawiin chawhnu hian Zheng Qinwen nen final luh inchuhin an inhmachhawn ang.
Yastremska hi Open era a Melbourne Park-ah qualifier khel chunga semi-final lut thei pahnihna chauh a ni a. Kum 1978 khan Christine Dorey chuan a sang pali inelna hi a lo khel tawh.
Hnehna vawi hnih a chan leh chuan kum 2021 US Open a qualifier khel chunga champion thei Emma Raducanu hnung a zui dawn a ni.
- Tunge Yastremska?
Ukrainian nula hi professional tennis-ah tleirawl beiseiawm tak niin bul a tan a, kum 19 mi a nihin world rankings-ah top 25-ah a lang.
Nimahsela kum 2021 January khan damdawi hman phal loh a taksaah hmuh a nih avangin hrem lailawk a ni a. A chungthu ngaihtuah a nih hnuah a test ah tihpalh avanga phal loh thil hi lo awm nia pawm a ni a. Hei vang hian thla ruk hnuah a hrem lailawkna hlih a ni.
Tun tournament-ah hian Grand Slam champion ni tawh pahnih Marketa Vondrousova leh Victoria Azarenka te a hneh tawh.
“Ka thlen thui tawh avangin ka zam deuh a, ka taksa pawh a hah. Ka ngaihtuahna a kal thui thin avangin ka zam leh thin a ni.” a ti a. A khingpui tur Zheng hian Anna Kalinskaya 6-7 (4-7) 6-3 6-1 in a hneh ve bawk.