African football a team tha nei thin Algeria an chesual a, Mauritania lakah rin loh taka tlawmin 2023 Africa Cup of Nations atangin an tla.
Thawhlehni zana Stade de Bouaké a inkhelah hian Mauritana tan centre-back Yali Dellahi chuan first half tawp dawnah inkhel a goal awmchhun a khung a. Vawi hnih AFCON champion ni tawh ram hi 1-0 in an barakhaih.
An tlawm avangin kum 2019 champion Algeria hian a zawna vawi hnih nan group stage an paltlang zo lo tihna a ni a. Group D-ah a mawng berah awmin hetihlai hian Mauritania hi pathumna ti tha zingah an tel ngei dawn a, knockout stage an khel ang.
Kumin AFCON-ah tla hma langsar zingah Algeria chauh an ni lova, champion tawh Ghana pawh an lo tla tawh bawk.
Lions of Chinguetti tia hming an vuah Mauritania hian huntawp dawn lamah theihtawp chhuaha goal ven an ngai a, hun pekbelh minute 11 chhung zawng an tang bawk a. Last 16-ah Cape Verde an tum ang.