Russian Ilyushin-76 sipai phur kual thin thlawhna chu an ram chhim lam, Ukraine nena an inrina bul lawk, Belgorod region-ah a tla.
Russian defence ministry chuan Ukrainian sipai an man mi 65 an chuang a, Belgorod region pan hian tang inthlenga thleng turin an kal niin a sawi.
A chuangte hi tute nge an nih leh Russian sawi hi a dik em tih finfiahna a la awm lo.
Ria Novosti news agency chuan mi dang pakua an chuang tel a, an zinga paruk chu thawktu an nih thu a tar lang bawk.
Ukraine-a general staff chuan thlawhna hian Russia ta, S-300 air defence system-in a hman tur missile a phur tih a sawi niin Ukrainska Pravda website chuan a tar lang a. Indonaa sipai man engmah a sawi lang ve lo.
Social media-a thlalak darhah chuan thlawhna hi Belgorod khawpui hmarchhak lam km 70 vela hla, Yablonovo khaw bulah Nilaini chawhma dar 11:00 (India-a chawhnu dar 1:30) velah a tlak hnuah a puak a, a kang nasa hle tih a lang.
Ukrainian chanchinbu thenkhat chuan Il-76 hi Ukrainian sipaite kah thlak niin an tar lang hlawm a; mahse, a hnuah heng thu hi an paih leh hlawm.
Ukraine-a general staff chuan engmah chanchin kimchang an la hriat loh thu leh an chhui zui ve mek thu BBC Ukrainian an hrilh.
Belgorod regional governor Vyacheslav Gladkov pawhin thlawhna a tlak thu a sawi a, a bak engmah a la sawi thui lo bawk.
Russia-a parliamentary defence committee chairman Andrei Kartapolov chuan a hnuah thlawhna dang, Ukrainian mi tang 80 phur chu tluang takin a thlawk thleng thung niin a sawi.
“Tun dinhmunah chuan mi tang inthleng chu sawi theih a ni tawh rih lo,” tiin Kartapolov hian Russian TV hnenah a sawi bawk.
Russian president thupuangtu, Dmitry Peskov chuan Kremlin chuan thlawhna tla hi a ngaihven hle tih a sawi a; mahse, chiangin engmah a sawi lo.
Il-76 a tlak thu a darh hnu lawkah hian Ukraine ram pumah reilo te chhung air raid alert tihchhuah a ni bawk.
Belgorod hi Ukraine ramri atanga km 40 vel chauha hla niin indona a chhuah atangin thlawhna hmanga kah an tuar nasa hle.
December khan thlawhna atanga kah an nih avangin mi 25 an thi a, mi 100 velin hliam an tuar bawk a. Ukraine erawh chuan sipaite chauh an bitum thu leh Russian air defence thil kah chhuah khawpuia tla vanga thi niin a puh let.