Prime Minister Narendra Modi chuan 2024 Lok Sabha inthlanpui atana a campaign chu Uttar Pradesh-a Bulandshahr atangin Ningani hian a tan dawn niin BJP chuan a sawi.
Bulandshahr-a vantlang inkhawm hi Thawhtannia Ayodhya-a Ram Lalla ‘Pran Pratishtha Samaroh’ neih hnua 2024 Lok Sabha inthlan tura campaign bul tanna tur a ni dawn a ni.
Party worker leh an hruaitute pawh an inbuatsaih a, Uttar Pradesh khawthlang lam khawpuia inkhawmah hian tam tak punkhawm an tum.
BJP hian Uttar Pradesh khawthlang lama bial 14-a bial riat hi an vawn lai a ni a, kum 2019 inthlanah khan bial rukah an chak lo thung a. Modi-a hian kum 2024 inthlan turah hian heng an chak lohna bialte hi lak ngei a tum nia sawi a ni.
Prime minister hian Bulandshahr atanga bul a tan turah hian mipuite leh an party mite inpawhtira hnehna chanpui a tum nia sawi a ni.
BJP chuan Bulandshahr-a vantlang inkhawm neih turah hian mi nuai nga vel an tel tur thu an sawi a. Prime minister hian Bulandshahr-a Navada-ah vantlang inkhawm a huaihawt ang a, Meerut Commissionerate-a shooting range field-ah hun a hmang zui dawn bawk.
Hetih lai hian Lok Sabha inthlan turah Rashtriya Lok Dal nen an tanho tur thu an puan tukah Samajwadi Party hruaitu, Akhilesh Yadav chuan Congress nen an state-a bial inchan sem dan tur a buaipui leh mek a, ‘INDIA tangho hi a chak tur a ni’ tih thupuiah a nei.
Yadav hian Lucknow-ah an party hruaitu, MP, MLA leh MLC hluite pawh telin a kawm a. Bial inchan sem dan chu hnehna an chan leh chan loh hriltu a ni thei tih a sawi.
Yadav hian an party worker-te chu vote nei tharte dapa an party-a sawm lut turin a ti.