Kum 43 mi ni chunga men’s doubles ranking thar tarchhuah mai tura world number one ni thei upa ber ni tur India star player Rohan Bopanna chuan a record thar lawmna atan vawiin hian Australian Open men’s doubles title a beisei zui leh dawn a, a kawppui Matthew Ebden nen Ningani khan semi-final match-ah 6-3, 3-6, 7-6 (10-7)-in Tomas Machac lehZhang Zhizhen inkawp an hneh.
Second seeded Indo-Australian pair hian darkar hnih leh minute hnih chhungin Zhang (world ranking 54) leh Machac (WR75) an paltlang a, Bolelli leh Vavassor tangdun nen title an inchuh dawn a ni.
Mipa double world number one thar tur Rohan Bopanna hi Ningani khan infiammi dang paruk nen India sawrkar laipui chuan civil mite chawimawina sang zinga mi Padma Shri dawng turin a thlang a, Padma Shri dawng tura thlan zingah hian veteran squash player Joshna Chinappa pawh a tel.
Padma Shri hi civil mite chawimawina dawn thin pali zinga a hniam ber niin, line hrang hranga hlawhtling leh thawhhlawk bikte dawn mi niin, Padma Shri chungah hian Bharat Ratna, Padma Vibhushan leh Padma Bhushan a la awm bawk.
Tarlan tawh angin, kum 2013 leh 2023-a US Open runner up lo ni ve tawh Bopanna hian vawiinah a career-a men’s doubles major title hmasaber tur beisei turin final a khel dawn a, chumi hmain a ram lamah chanchin lawmawmin a deng zui ta a ni.
Kum 2017 khan Canadian Gabriela Dabrowski nen thawkdunin French Open lamah mixed doubles title a lo sualchhuak tawh a, Indian zinga Grand Slam trophy hawn thei palina chiah a ni.