Nitish Kumar-a chu Pathianni tlai khan Bihar chief minister atan a vawi kua nan lak luh leh a ni ta a, BJP nen tangdunin sorkarna a siam.
Kumar-a hian a sorkar liam chiah, Pathianni tuka tlu taa a thawhpui, Rashtriya Janata Dal (RJD) atanga minister a neihte chu BJP miin a thlak nghal a. Samrat Chowdhury, Vijay Sinha leh hruaitu dang eng emaw zatin Raj Bhavan-ah rinawmna thu an tiam.
Prime Minister Narendra Modi-a chuan sorkar thar a lawmpuina hi X-ah a tar lang nghal.
“Bihar-a NDA sorkar din leh tak hian state hmasawnna tur leh mipuite mamawh thlen turin a tih theih apiang a ti ang a. Nitish Kumar-a ka lawmpui a, deputy chief minister atana lak luh, Pu Samrat Chaudhary leh Pu Vijay Sinha-a te ka lawmpui a. An kaihhruai sorkar hian Bihar-a ka chhungte duhna an tipuitling ngei ang tih ka ring tlat a ni,” a ti.
Kumar-a hian Pathianni tuk khan Bihar Governor Rajendra Arlekar hmuin a bânna a thehlut a. Governor hian sorkar thar lak luh hma chu chief minister nihna lo chelh zui turin a ti a. A hnu lawkah hian BJP MLA-ten an thlawp avangin sorkar a siam theih thu a thlen leh nghal a. Governor-in a lehkha hi lo pawmsakin a vawi kua nan chief minister atan lak luh leh a ni ta a ni.
Kum 72 mi, Kumar-a hian tun hi a kum 10 chhunga a thawhpui a thlak vawi ngana a ni ta a, a tan a thlak sek avang hian ‘Paltu Kumar’ tiin a hming pawh phuahsak a ni a, ‘Pet Kumar’ tihna a ni.
Kumar hian kum 2022 mai khan BJP a thawhpuina a lo titawp tawh a. Hetih hun lai hian chief minister hian Maharashtra-a Shiv Sena an tihphel angin BJP hian a kaihhruai, Janata Dal United (JDU) chu tihphel an tum niin a sawi a ni.
BJP a chhuahsan tirh khan saffron party hian kumkhuain Kumar-a tan kawng an khar tawh tur thu sawi mah se an hawng leh ta bawk.
Pathiannia BJP kaihhruai tangrual, NDA a zawm leh takah hian eptu tangrual, INDIA chak lo a tih thu a sawi nghal a. A theihtawpin BJP bei tura tangrual tura a thawk chungin mi dangin engmah tih an nei ve mang lo niin a sawi a ni.
“(August, 2022)-ah Grand Alliance thar kan din a; mahse, boruak a tha zui lo. A awm dan hi a tha lo hle a ni,” a ti.
“A hlawhtlin theih nan, INDIA awmze nei tak a nih theih kan ka thawh a; mahse, mi dangte hian engmah an ti ve lo va, he tanhonaah hian thil dik lo a awm a ni. Mipuite pawh an lawm lo,” tiin thuthar lakhawmtute hnenah a sawi.
Mi thenkhat chuan Kumar-a hi inthlan hmachhawn tura INDIA a inbuatsaihna leh prime minister atana vawrh chhuah turah an en kân chu a lungawi lo niin an sawi a. Lok Sabha inthlan tur atana bial inchan sem dan tur sawiho tihkhawtlai reng chu tha a ti lo bawk nia sawi a ni.