Mizoram cricket in a la dai ngai loh ram a dai a, India ram chhunga first class cricket inelna Ranji Trophy ah Mizoram senior team in Plate Group chhuahsan theihna an nei dawn.
Mizoram hian Lal Bahadur Shastri Stadium-ah Meghalaya hmachhawnin ni li chhung inkhelah a ni li naah Thawhtanni khan run 191 in hnehna an chang.
Mizoram tana che tha langsar zingah outstation player Agni Chopra chuan 1st leh second innings-ah run 105 leh 101 a siam a. Tualchhung player ten thlawp tha bawkin Lalhruaizela leh Vikash Kumar ten run 57 leh 67 an siam a. Lalhruaimawia chuan first innings-ah run 39 a siam hman chu a tangkai.
Second innings-ah tualchhung player atang Jehu Anderson chuan run 51 a siam a, Vikash-a’n run 30 a siam leh.
A vawmtu lamah outstation player pahnih KC Cariappa leh Mohit Jangra ten innings hnih chhungin wicket 10 leh wicket 6 an la a. Meghalaya second innings-ah Mizo all-rounder tha Joseph Lalthankhuma’n wicket thum a la ve bawk.
Mizoram hian 1st innings-ah run 359 an siam a. Meghalaya in run 281 a chhangin Mizoram in 2nd innings-ah run 237 an siam hnuah chak tuma vawm an thlang a. Meghalaya hi run 124 chiah an siamtir.
Plate Group-ah hian a sang pali in semi-final an khel dawn a. Heta final khel pahnihte hian season tharah Elite Group an kaisang dawn a ni.
Mizoram hi khelh li atang vawi hnih an chakna niin vawikhat draw result an nei a. Team paruk awmna group ah pahnihna an ni mek.