Daniele De Rossi hnuaia AS Roma in bul an tan that chu a kaltluang zel a, a zawna vawi hnih an chakna ni turin Salernitana lakah 2-1 in an chak.
De Rossi hian January 16 khan manager Jose Mourinho thlakin a team hlui a enkawl tan a. Verona laka a chakpui nghal hnuah Thawhtanni zan khan Arechi Stadium-ah point thum an hmu nawn.
Roma tan hian Paulo Dybala penalty pet goal leh Lorenzo Pellegrini te goal khung chu hnehna chan nan a tawk a. Dybala hian minute 51-naah Gianluca Mancini penalty hlawhchhuah a khung a. Minute 15 hnuah Pellegrini in goal a khung belh.
Grigoris Kastanos chuan mualneitu team tan goal khat khung ve mahse a zawna league a vawi thum an tlawmna an dal zo lo a ni.
Pangana a inhlangkai Roma coach chuan, “Ni 12 hi inthlak danglam a, inzir thar leh turin hun tlem tak a ni a, keima lam atang pawhin ruahmanna fuh lo a la tam hle.” tiin hnehna an chang chungin an inkhel a thlirlet.