- George L. Ralte, Vaivakawn
Media hi kan inbiak pawh tawnna a nih mai bak ah thu leh hla lam a kan hmanrua pawimawh leh tangkai tak a ni.Mi tam takin a ruala kan dawn theih leh kan hman tangkai em em hi MASS MEDIA niin chungte chu.
Radio
Television
lehkha/thuziak
Cinema
Telephone
Computer
Kei mahni ngeiin kan awka leh chetzia a thu awmze nei a kan entir reng reng hi MEDIA chuan a huap tel vek a,hei hi Presentation Media tih a ni.
Khawvel thang zel ah hian MEDIA hian mihring nun hi a khawih danglam nasa thin hle mai a, a tangkaina tam tak sawi tur a awm laiin a tha lo zawng a hman theih hi tam tak a awm bawk avangin khawtlang ah leh Kohhran ah tun aia nasa a MEDIA kan hman tangkai zel theih nan kan in fuih thar a,MEDIA fimkhur tak a hman a nih zel theih nan Media lam a kan mi thiam ten mipui te hnen ah zirtirna nasa tak in pek thin hi a pawimawhin a tul tak zet a ni.
Kan hriat hauh loh laia min zirtir rengtu chu kan thil hmuh leh kan hriat thin te hi niin heng te hi MASS MEDIA hian a keng tel vek a ni.Tunlai sualna langsar zual thenkhat mipat hmeichhiatna hman dik loh te, hlemhletna hrang hrang te, zu leh damdawi hman khawloh te, dan bawhchhiat te, tharum thawh leh tualthahna thleng hian eng emaw chen chu MASS MEDIA hian a keng tel a, thil tha lo tam tak kar ah hian mihring te thianghlimna hi a bo zo vek thin a, heng thil hian a hran pain sual ti turin min fuih hlauh lo a, kan rilru lam ah erawh nasa takin min kai peng thin a, lehkhabu chhiar leh film en atang te hian kan khaw hawi kan ti zau thei viau laiin a tha lo lam ah pawh min zirtir a hlauhawm khawp mai.A tir a sual anga lang lem lo pawm zam hian kei mahni ah sualin hmun a khuar zui duh viau thin.
Tunlai a hmanrua tangkai tak a kan hman mek COMPUTER te pawh hi eng line line emaw hmang a thlun zawm in kan hriat duh engkim mai hi awlsam takin a hmeh chhuah zung zung theih a, he thil hi hmang tangkai duh tan chuan thil tha tak niin heng atang te hian sakhaw duk dak lo thil tam tak an in zirtir mek zel bawk a,sakhaw kal sual pakhat HEAVEN S GATE an tih ho pawh hian MEDIA hmanrua pakhat hmangin an thurin an vawrh darh thin niin an sawi a, hman deuh khan hetiang thil tha lo tam tak hi hmuh tur leh hriat tur a tam thin a ni awm e.MEDIA lam a kan hmasawn mekna te hian kan nun a ti bawlhhlawh theih em? Thianghlimna kawng ata min hruai peng em? tia in zawt chunga fimkhur tak leh uluk taka MEDIA hi kan kal pui a tul tak zet a ni.