- Ruata
Premium hatchback huanga Hyundai i20 leh Maruti Suzuki Baleno te nena inel mek Tata Altroz chu hmel thar nen an thar tihchhuah tumin Tata chu a inbuatsaih mek a, tunah hian kawngpuia an enchhin lai thlalak leh video pawh a darh leh mek tawh a ni.
Tunhnaiah Tata Altroz thar tur hi emission testing an nei lai hmuh a ni zeuh zeuh a. Tuna chhuak mek Tata Altroz mawi leh changkang tak hi January 2020 atang khan tihchhuah tan a ni a. Tuna a thar lo chhuak tur hi Tata chuan an peih thawkhat tawh niin a hriat a, tun atanga reiloteah an tlangzarh mai a beiseiawm tawh a ni.
- 2024 Tata Altroz facelift design leh thildang
Tata Altroz facelift lo chhuak tur thalak darh mek hi a pianphung leh a nihna thup thei ang berin camouflage vek a ni a. A landan maiah chuan danglamna liantham a awm hmel loh a, a ke pawh a hman mek ang 16 inch wheel a la hman zel hmel a ni. Facelift model lirthei reng renga kan hmuh ang, danglamna tam vak lo, a landan khawi emaw lai ennawn mai chauh bakah a kentel thenkhat tihbelh chauh chu Altroz thar turah pawh hian a nih hmel a, Tata SUV thar ho hmel te a rawn pawl ve deuh erawh a beiseiawm a ni.
- A chhunglam
A pawnlam design aiin a chhunglamah hian Altroz thar tur hi danglamna a tam zawk deuh beisei a ni a. A hma aia infotainment screen lian zawk, tuna Nexon leh Punch EV thar te a kan hmuh ang, 10.25 inch screen chu a rawn kentel ve ngei beisei a ni bawk. Altroz Racer concept tunhnaia kan hmuhin a neih ang – 7.0-inch digital instrument cluster, ventilated front seat, airbag paruk (6), wireless charging, air purifier, leh adangte kan hmuh a rinawm bawk a ni.
- A khawl
Altroz facelift hian Altroz Racer concept-a khawl chak zawk awm ang, 120hp power pechhuak thei, 1.2-litre turbo-petrol engine emaw 125hp power pechhuak thei, 1.2-litre direct injection turbo-petrol engine, Curvv in a neih tur emaw te chu a khawi emaw zawk zawk hi a hmang ve ang em tih a la sawichian theih loh a. Hetihruala thil chiang deuh ni a lang chu, 88hp power pechhuak thei, 1.2-litre naturally aspirated petrol khawl leh 110hp power pechhuak thei, 1.2-litre turbo-petrol engine te chu a la awm zel hmel a. CNG hmang, Tata twin cylinder tech, 88hp power pechhuak thei khawl pawh duhthlan tur a awm hmel bawk a ni.
Naturally aspirated engine hian 5-speed manual leh 6-speed dual-clutch automatic transmission te duhthlan tur a nei dawn a. Turbo-petrol hmang hian 5-speed manual gearbox chauh a nei thung dawn a ni. 6-speed dual-clutch auto pawh hi turbo-petrol engine hoah an enchhin ve niin a hriat a bawk a, sawichian theih a la ni lo a ni.
Tata hian an premium hatchback hralh kal leh an larpui em em hi a chanchin kimchang takin an la tidarh lo a. Tuna kan han tarlan tam tak pawh hi media hrang hrang report a ni rih mai a. A chhuak har tawh dawn lo bawk a, a chanchin kimchang leh chiang zawk pawh kan hre chho zel ang a. Altroz lei tumte tan chuan a thar, facelift model lo chhuak tur hi thu lawmawm tak a ni dawn a, premium hatchback huanga lirthei lei duhte tan pawh lo nghah a, enchhin phawt ngei chi a ni awm e.