Pathianni zinga NBA regular season khelhah Golden State Warriors player pawimawh Stephen Curry a khelh tha hle a, point 60 zet a thawkchhuak. Curry-a point 60 thawhchhuah hian Warriors an chakpui zo chuang lo thung a, an khingpui Atlanta Hawks chu overtime-ah an hneh lo.
Season kal meka khel tha tluang hlei thei lo Golden State Warriors hian Atlanta Hawks lakah bul an tan tha a, quarter khatnaah point 5 in chungnung zawkah an tang. Quarter hnihnaah Hawks an insiamtha a, point ngain an chungnung ve leh a, chungnung zawk awm lovin chawlhlawk an hmang.
Chawlhlawk hnu lamah team hnihte an inhnehtawk zui viau. Quarter thumnaah point 25 ve ve thawkchhuakin an inhnehtawk a. Quarter hnuhnung berah point 34 ve ve thawkchhuakin an inhnehtawk zui leh a. Hun pangngaiah point 123 ve ve thawkchhuakin chak zawk an dawm thei lo. Hun pangngaiah chak zawk an awm theih loh hnuin overtime khelh chhunzawm a ni.
Overtime-ah hian Warriors in point 18 zet an thawhchhuah laiin Warriors in point 11 chauh an thawkchhuak thung a. Inkhel hmuhnawm takah Atlanta Hawks chuan point 141 – 134 in Golden State Warriors an hneh ta a ni.
Atlanta Hawks laka an tlawm tum hian Warriors player pawimawh Stephen Curry chuan point 60 zet a thawkchhuak a, a chetha hle. Curry hian NBA-ah point 60 a thawhchhuah vawi hnihna a ni a, kum 2021 khan Portland Trail Blazers an hmachhawn tumin point 60 a lo thawkchhuak tawh bawk.
Pathianni zinga inkhel dangah Los Angeles Lakers chuan point 113-105 in an khingpui New York Knicks an hneh. Knicks an hneh tum hian LA Lakers player pawimawh LeBron James chuan point 24 a thawkchhuak.