South Africa Cup of Nations khelh chhunzawm zel a ni a, quarter-final khelh zawh a ni tawh. Inelna neih mekah inelna thlengtu Ivory Coast an vanneih a kaltluang a, Mali hnehin semi-final an lut. Nigeria, DR Congo leh South Africa ten semi-final an lut ve bawk.
Inelna thlengtu Ivory Coast hian inrinni zan khan quarter-final an khelh tawha la tlawm ngai lo Mali an hmachhawn a. Hun pangngaiah 1-1 an inhnehtawk hnuin extratime tawp dawn, hun pek belha Oumar Diakité goal thun an chakpui a, harsa takin semi-final an lut.
Stade de Bouaké-a inkhelah Mali leh Ivory Coast te an inhnehtawk viau a, goal pawh a lut har hle. Minute 71-naah Nene Dorgeles chuan Mali hmahruaina goal a thun nawlh a, he goal hi an chakpui teuh hle. Elephants hi si phurh zawk an nih bakah chawlhlawk hmaa Odilon Kossounou hnawhchhuah a nih vangin tlem zawk an ni bawk a, an dinhmun a chhe hle. Dinhmun derthawng takah ding mah se huaisen takin an inlan a, Simon Adingra chuan minute 90-naah an si phurh a sut ta nge nge a, hun pangngaia tlawm an pumpelh.
Hun pangngaih chak zawk an awm thei lova, extratime-ah pawh chak zawk an awm thei lo teuh hle. Hun tawp dawn tep minute 120+2-ah Oumar Diakité chuan chakna goal hlu zet mai a thun. Ivory Coast in hmahruai letna goal an thun hnuin inkhel boruak a sang zui a. Chakna goal thuntu Oumar Diakité leh Mali player Hamari Traoré hnawhchhuah an ni. Inkhel hmuhnawm tak chu goal dang luh belh lovin a tawp a, Ivory Coast chuan hnehna pawimawh tak an chang a, semi-final an lut. Elephants hian semi-final-ah DR. Congo an hmachhawn zui leh ang.
Inelna thlengtu Ivory Coast laka fiahna hautak hmachhawn tur DR Congo hian inrinni zana an khingpui Guinea chu 3-1 in an hneh. DR Congo hian minute 21-naa Mohamed Bayo penalty vangin si an phur hmasa zet a. Chancel Mbemba, Yoane Wissa leh Arthur Masuaku te goal thun hmangin an khingpuite an lehthal.
Inrinni zana inkhel dangah Cape Verde Islands leh South Africa te chu goal awm lovin an inhnehtawk a. South Africa si nghak Rowen Williams chuan penalty vawi li ngawt a dang a, an player ten vawi hnih thelh bawk mah se 2-1 in hnehna an chang zui ta tho a, semif-nal a hruai thleng. South Africa hian si khat faia Angola hnehtu Nigeria an hmachhawn zui leh ang.