Inrinni zana English Premier League khelhah Aston Villa chuan table mawngphaha awm Sheffield United chu 5-0 ngawtin an sawp. Chiang taka an chak laia Tottenham an chak zawh loh vangin Villa hi palinaah an kir a, top 4 huang an luah let leh.
Panganaa tlahniam hman Aston Villa hi table hnuai ber luahtu Sheffield United hmachhawn turin Bramall Lane-ah an leng lut a, nuamsa takin hnehna an chang, Villa hian Sheffield lakah an khel tha tak zet a, minute 47 chhung lekin goal nga zet an thun hman. Inkhel tan atanga minute 12-na lekah John McGinn chuan hmahruaina goal a thun.
Hma taka goal an thun hian Unai Emery team a fuih phur a, goal an thun belh leh thuai. Goal hmahruai an thun atanga minute li hnu lekah Ollie Watkins chuan Douglas Luiz siamsak atangin an goal hnihna a thun. Luiz goal thun hnu hian Leon Bailey leh Youri Tielemans ten goal an thun belh leh a, si li faia hmahruai chungin chawlhlawk an hmang.
Chawlhlawk hnu lamah Villa an khel tha chhunzawm a, goal an thun leh thuai. Second half tan atanga minute hnihna lekah Álex Moreno chuan an goal ngana a thun a, a tawp a khar. Sheffield United hian goal thun tumin tan khawh nasa hle mah se hlauhawm siam tur khawpin season kal meka khel tha Villa an nawr tlang thei lo. Villa pawhin an khingpuite chungtlak zui viau mah se goal an thun belh thei tawh bik lova, goal ngaah an lungawi a ngai.
Awlsam taka Aston Villa an chak lai hian palinaa awm mek Tottenham chuan Everton laka an hmahruaiana an humhim zo lova, uiawm takin an chak zo lo.
Goodison Park-a lenglut Tottenham Hotspurs hian an player pawimawh Son Hueng-min tel lovin bul an tan tha hle a, minute lina lekah Richarlison chuan hmahruaina goal a thun nghal. Minute lina lekah goal an chhuah hi Everton tan Jack Harrison chuan minute 30-naah goal thunin a sut. 1-1 a nih hnuin Tottenham an khel tha sauh a, goal an thun belh leh thuai. Minute 41-naah goal hmahruai thuntu Richarlison chuan an goal hnihna a thun a, 2-1 a hmahruai chungin chawlhlawk an hmang.
Chawlhlawk hnu lamah Everton in an si phurh an sut mai thei lova, an mualah an tlawm teuh hle. Hun pangngai tawp thlenga goal thun thei lo Toffees tan hian hun pek belh minute 90+4-ah Jarrad Branthwaite chuan goal pawimawh zet mai a thun a, team lian Tottenham lakah tlawm an pumpelh thei hram a. Point khat hlu bik an hmu zui ta a ni.
Everton lakah Tottenham an chak zawh loh vangin Sheffield United hnehtu Aston Villa chuan Tottenham hi point hnihin an lehpel a, top 4 huangah an kir leh.
Inrinni zana inkhel hmuhnawm dang; goal 8 zet luhna inkhelah Newcastle United leh an mikhual Luton Town te 4-4 in an inhnehtawk a. Brighton in 4-1 an mikhual Crystal Palace an sawp laiin Burnley leh an mikhual Fulham chu 2-2 in an inhnehtawk ve thung. Burnley hian an mualah chak theihna hun tha an neih an bawh pelh.