Burkina Faso hmarthlang lama khaw pakhatah, Inrinni zan khan bike-a chuang ralthuam keng mi eng emaw zatin khaw mite pawngkahin mi 20 vel an kap hlum.
An ram khawpui, Ouagadougou hmar lama Bani municipality huam chhunga hmun pakhatah hian tute nge an nih hriat loh mi sual, ralthuam tha tak tak kengte hi motorbike-a chuangin an lut a, Inrinni zan khan zankhua deuhthawin khaw mite hi an kap a ni.
Inrinni zana beihna hi kar kalta maia Silgadji khaw bazara mi 39 zet helhovin an thah hnu lawka thleng a ni.
Sahel region hi Muslim firfiak pawlte tamna niin tun hnai thleng eng emaw ti chhung hi tharum thawhna a thleng ngun hle a. Inrinni zana thil thleng leh avang hian France chuan Sahel region-ah hian sipai 600 dah luh belh a tum thu a puang zui nghal a, French sipai hi 5,000 chuang an awm tawh dawn tihna a ni.
Nikum khan Sahel huam chhungah hian helho chetna a thleng nasa hle a, kum 2012 hnu lama civil mi an thih tam ber tum niin mi 4,000 chuang an thi.
Sahel-a tharum thawhna a thlen tak chiam chhan hi kum 2012-a inlakhran duh pawl leh Islamist hel tangrualten Mali hmar lam an lak atang khan a ni a. An lakah hian France chuan beihpui thlakin sipai a dah mek a ni.
Kum 2015 khan inremna pawh ziah a lo ni tawh a; mahse, a tak taka kalpui erawh a ni lo va. Hel pawl thar piang zel zawkin Mali laili, Burkina Faso leh Niger ram thlengin an inzar pharh tawh a, an zingah hian al-Qaeda leh Islamic State (IS) firfiak pawl nena inzawm pawh an awm nual.