Aizawl : Champhai North Bialtu MLA, Adviser to CM ni bawk Er. H. Ginzalala’n Zirtawpni khan Champhaia sawrkar department hrang hranga head of office-te a kawm.
Er. H. Ginzalala chuan Champhai District-in hma a sawn theihna turin official-te chu an theihna kawngah theuh thurawn pe tur leh an thahnemngaihna te awmze nei zawka an ka- lpui theihna tura finch- huah thin turin a ngen.
Sawrkar hnathawk ten thil tum inang nei mahse, kalpui dan a darh thin avangin hmasawnna a kal chak mawh thin niin a sawi a. Ramin awmze nei zawka hma a sawn theihna tur in thawhhona tha zawk an mamawh tih sawiin, department hrang hrang ten an remhriatna an thawhkhawm thiam phawt chuan hmasawnna a chak lo thei lo niin a sawi.
Champhai district-in hmasawnna kawng a zawh chu khawtlang tana tha tur a nih thu sawiin, ram economy leh environment tan a tha ngei ngei tur a nih thu a sawi a. “Heng te tel lova hmasawnna kawng kan zawh chuan a hlawhtling tak tak thei lo”, a ti.
He hun hi Circuit House-ah hman niin Addl. DC, Champhai M. Misael-a’n a kaihruai a, sawrkar department hrang hranga head of office ten zawhna leh sawi duh an neih te MLA hian a ngaihthlaksak bawk a ni.