Inrenchem awmzia hi hrilhfiah ngai lovin kan hre vek awm e. Inrenchem chuan kan neih ang ang ren taka hmang chunga hmasawnna lam hawia hma lak zel hi a kawk a. Nun khawchhuahna tura plan mumal awma, rilru fim taka ngaihtuah chunga ram tana ke pen a kawk ber mai. Inrenchem thiam lo chu eng ang pawhin sum hai lut mahse rei an daih ngai lo. An hmuh tam leh an hmang tam a. Reiloteah an rethei zui leh tho thin. Inrenchem tih hian retheih huam pawh a keng tel bawk a ni. Nuam taka khawsa chungin a inrenchem theih loh bawk. Inrenchem tur chuan mi neih ang neih loh ngam a ngai a, hausa zawkte khawsak anga khawsak loh ngam a ngai. Inrenchem chunga khawsak thiam chu an dingchhuak thin.
Kan sawrkar tharin kan ram retheihna hrechiang takin inrenchem chung a insawhngheh kum (year of consolidation) in bul an tan dawn niin an puang a. Kan ram dinhmun harsa lutuk atanga khaichhuak tur chuan retheih hmasak hi a ngai a. Kan sawrkar pawhin a hruaitute chu retheih hmasak an huam a ngai a ni. Tunah hian kan ram dinhmun dik tak chu leiba tam chung nei chunga khawsa tawk tawk kan ni a. Chutih laiin hnathawktu tam tak nei, hlawh pek reng ngai tho si, puk tur dap kual reng chunga dinchhuah tum kan ni a. Kan dinhmun hi ngaihtuaha hrechiang duh tan chuan chhe tak a ni. Chhe tak ani kan tih rual hian ram kaihruaitu ten chhe tak dinhmuna ding kan ni tih pawh an hriat chian hle a ngai a. Hrechiang lo chunga nuam taka dinchhuahna lam an sawi ve ringawt chuan hma lam.pan chu thil huphurhawm tak ani ang.
Rethei chung pawha chhungkaw pa berin pawisa tlenlmte a kawla, a thla a muan ve ringawt chuan neih chhun hmanral leh kha a kawng hmabak ani mai a. Hnathawktu a lak khawmin hnathawk thei ngei an ni em. A duhsak zawng chu hnathawk turin a ruat kual mai mai em tihte hi a bul tanna tur ani ang a. Tangkai hauh lo tur mihring, a sangawizawn pui satliah a huikhawm chuan ram ropui a thleng ngai lovang a. Retheihna atanga dinchhuah tik ni a awm lovang. Hnathawktu tangkai nilo, nawmsakna lam hawi an awm dul chuan sum awmchhun chenral kha an hmabak a ni a. Chuvangin kan sawrkar hian inrenchem a tum tak tak anih chuan retheih hmasak huam a, hnathawktu lakkhawm pawh a fimkhur a ngai hle. Mahni hmasial, hun kal tawhah pawha inrenchemna lam hawi ngai lem lo ho nen chuan inrenchem bul a tan theih loh a. Inrenchem tur chuan thinlung a in peih a ngai a. Thinlung lamin inrenchem a kawh loh chuan bul a tan theih loh a. Inremchem turin mi tih ang tih loh ngam a ngai bawk.