Aizawl: ZPM Leader Lalduhoma, chief minister chuan, “Zoram thar kan hnaih zel niin kan hria,” a ti.
He thu hi Inrinnia Vety Rest House, Selesih-ah ZPM Aizawl North I Block buatsaihin sorkar thar lawmna leh bialtu MLA chawimawina hun neiha a hmanpuinaah chief minister Lalduhoma’n a sawi.
Chief Minister Lalduhoma chuan, an campaign lai khan an party worker-te an thawkrim ber tih an pawm thu sawiin, “Kan chakna hi party mal chakna ni lovin, mipui chakna a ni. Ram mipui nawlpuiten ram roreltu an thlang a neutral te hi an pawimawh em em a, neutral kan tam poh leh kan ram hian a thatpui dawn a ni,” a ti.
Tunah hian kalphung thar mipui sorkara a key pawimawh ber, PWD department changtu bialtu MLA Aizawl North I mipuiten an nei tih sawiin Lalduhoma chuan, “Kan minister hi kan thla a timuang em em a ni. A bul kan tan chauh a ni a, mipui mi mirah leh sorkar hnathawkah a tha lam duhna a lo lian zel a, a lawmawm em em a. A tha zawnga rilru kan insiam zel niin ka hria a. Zoram thar kan hnaih zel niin ka hria,” tiin, a siam thatu ni zel turin kalkhawmte a chah.
An sorkar hma aiin an sorkar hnuah mipui hian an lakah beiseina an nei sang zel tih sawiin Lalduhoma chuan, “Inthlan hmaa kan thusawite thu-a chantirtu tur kan ni a, kan taihmak lehzual a ngai a ni. Ni 100 chhunga tih tur kan ruahmante pawh kan tihlawhtling chho zel a, mipuite a bikin kan thalaite mahni ke a ding thei leh chhuangkaw intodelh a tam thei ang ber siam kan tum a, tupawh lo sorkar se, mahnia intodelha dingchhuak thei tura siam hi kan tum a ni,” a ti.
Aizawl North I bialtu MLA, Vanlalhlana, Minister pawhin thu sawiin, “Kan campaign laiin hlim takin kan campaign a, kan thawhrim rah kan seng ta a, kan zavai a kan thawhrim rah a ni. Kan bial chhungah polling station zawng zawngah hnehna kan chang a, a lawmawm em em a. He hnehna hi kan zavaia ta a ni,” tiin, MLA-te chu mipui aiawh a ding mai an nih thu ni a, a hlawhtlinna erawh chu mipui ta a nih thu a sawi.