Club lian, club hausa leh player lei nana sum seng hnem Chelsea tum a fuh hlei thei lova, Pathianni zana an mikhual Wolverhampton Wanderers lakah 4-2 ngawta tlawmin an mualpho nawn leh. An tualzawlah ngei an tlawm leh tak vangin manager Mauricio Pochettino dinhmun a derthawng leh zual.
Kar liam ta nilai zan khan Chelsea hi Liverpool lakah 4-1 in an lo tlawm tawh a, Anfield-ah an mualpho. Anfield-a an mualphona chu Stamford Bridge-ah ngei hnehna changin khuh mawi an tum hle. An mikhual Wolves hneh ngei tum mah se Matheus Cunha hat-trick vangin tlawm zawkah an tang nawn leh a, an mualphona zakhua a sei ta hlauh zawk. Blues hian EPL an khelh hnuhnung pahnihah goal li an chhuah zawn a. December 1989 hnu lamah EPL-a goal li chin an chhuah zawn leh hmasak ber a ni a, Pochettino hnuaiah record chhe tak an nei.
Chak mamawh Chelsea hian Wolves lakah bul an tan tha a, Cole Palmer chuan minute 19-na lekah hmahruaina goal a thun nghal. Hma taka goal an thun vangin Blues phur mah se an mikhualte an chhaihkawlh a ni ta lek fang a, goal li ngawt an chhuah zawn. Wolves tan hian Matheus Cunha chuan goal an chhuah atanga minute thum hnu lekah goal thunin an si phurh a sut. Goal lut a han deuh vang vang hnuin minute 43-naah Chelsea player Axel Disasi chuan an lamah a ti-goal a, Wolves hmahruaina goal a thunsak.
Chawlhlawk hnu lamah Wolves an khel tha leh zual a, goal hnih an thun zawn. Minute 63-naah Matheus Cunha chuan an goal thumna thunin an hmahruaina a tizau a. Goal hnih thun tawh Cunha hian minute 82-naah penalty atangin an goal lina a thun zui leh a, team lian lakah hattrick a siam ta hial. Si thum ngawta an hnufual hnuin Chelsea defender Thiago Silva chuan minute 86-naah an goal hnihna a thun a, an inkar tizim hret. Silva goal thun vanga phur tharin, point hmuh tum viau mah se Blues hian goal dang an thun belh thei lova, an mualah ngei an mualpho zui ta a ni.
Wolves hian 1979 hnu lamah Chelsea hi inelna hrang hrangah si hnih an la hneh ngai miah lova, Kum 45 zet hnuah an tawn ngai loh tawnin hnuhma thar an hnutchhiah. Wolves in a tha zawnga hnuhma thar an hnutchhiah laiin Chelsea erawh chuan a chhe zawngin hnuhma thar an hnutchhiah ve thung. Wolves lakah an tlawm leh tak vangin Chelsea manager Mauricio Pochettino dinhmun a derthawng leh zual a, Argentine hian ban a tawh thuai a rinawm.
Wolves laka tlawm Chelsea hi 10-na atangin 11-naah an tlahniam a, an hneh loh Wolves hnuaiah an awm mek.