Kum liam ta chhung khan Central Armed Police Forces (CAPF) leh Assam Rifles sipai 128 zet an intihlum a, kum thum liam ta chhunga an intihhlum tam ber tum a nih thu sorkar chuan Parliament-a rorel inkhawm neih mekah a tar lang.
Minister of State for Home Nityanand Rai chuan Lok Sabha-a ziaka zawhnaa a chhannaah nikum khan CAPF sipai 128 an intihlum a, 2018 khan 96 niin 2017 khan 121 an intihlum bawk tih a tar lang.
“CAPF leh AR sipaite hi an rilru hahna tihtlem leh an hnathawhna tihchangtlunsaka nuam ti taka hna an thawh hi ministry-in a ngaih pawimawh tak a ni,” a ti bawk.
CAPF an tihte hi Central Reserve Police Force (CRPF), Border Security Force (BSF), Central Industrial Security Force (CISF), Indo-Tibetan Border Police (ITBP) leh Service Selection Board (SSB) an ni a. Assam Rifles (AR) nen hian union home ministry hnuaia awm an ni.
Heng sipaite hian hna chi hrang hrang thawkin hel beihna te, Maoist beih te, ramri ven te, VIP ven leh ram himna atana thil hrang hrang thawh leh state inthlan a awma dan leh thupek kenkawhna pui tura state police-te puih chu an hna ber a ni.
Rai chuan heng sipaite hi an rilru hahna tihnepsak an nih theih nan theihtawpa hma lak a nih thu leh an hnathawh dan kalhmang pawh a nawm zawk theihna tur an ngaihtuah tih a sawi a. Heng zingah hian an awmna hmun sawn leh chawlh an lak theih dan te, hna an thawh laia an inhliam palh avanga enkawl dan leh chawlh an lak theih dan te, hmun ralti zuala awm theih hun chhung thlenga tihdanglamsak an ni thin tih a sawi.
Hetianga hma lak a nih bakah hian an officer-ten an tlawh zin te, an duty chhung hunbi felfai zawk theih dan tur te, an khawsakna tihnawmsak te, an awm hahdamna tur siamsak te, an intihhlimna tur buatsaih te, hlimhlawp thil te, infiamna lam leh inbiakpawhna tha zawkte pawh ngaihtuahsak zingah a tel tih minister chuan a sawi bawk.