Aizawl: Court of Special Judge (Prevention of Corruption Act) chuan All India Radio, Aizawl Station sum tihchingpen thubuaia thiam loh a chantir mi pathumte hremna chu nimin khan a puang.
Aizawl District Court-a Special Judge (PC Act) Dr HTC Lalrinchhana chuan nimin chhun khan mi pathumte hremna hi a puang a, thubuai siam a nih laia assistant director, Zosangzuala chu kum li lungin tang tur leh Rs. nuai 6 chawi turin a hrem a, sum a chawi tur hi a pe thei lo a nih chuan kum thum dang lungin a tang chhunzawm dawn a ni.
Ani bakah hian a thurualpui, Programme Executive Lalnunziri leh LDC Judy H Lalmuanpuii te chu kum hnih jail tang tur leh Rs. nuai 6 chawi ve ve turin a hrem a, pawisa chawi tur a neih loh chuan kum thum dang lungin tang turin a ti bawk.
Court-in a tar lan danin Zosangzuala, Lalnunziri leh Judy H. Lalmuanpuii te inthurual chuan kum 2012 kum khan Casual Production Assistant 20 chu tum 54 zet All India Radio, Aizawl Station-a chhawr angin lehkha lem hmangin an ziak a, hemi atana sum kal ral chu Rs. 2,60,444 ni a, hei bakah hian music artiste 39 chu hla record-tir anga lehkha lem siamin, sum Rs. 6,08,916 an tichingpen bawk a, he thubuaiah hian thiam loh chantir an ni ta a ni.