Aizawl: Mizoram Pradesh Congress Committee (MPCC) hnuaia Aizawl khawpui bika hruaitute nimin khan Lal Thanhawla Auditorium-ah an inhmu khawm a. He hunah hian President Lalsawta chuan thu a sawi.
MPCC President Lalsawta chuan inthlanpuiah an chak lo chu pawi a tih thu sawiin, “President ka nihna angin mawhphurtu ka ni a, mipuiin nghah an nei a, enchhin phawt loh chuan khawdang hawi an tum lo tlat a ni. Hruaitu ber nih angin kan tla a, a pawi ka ti em em a ni,” a ti.
“Kum lamah kan upa ta a, kan party ka hruai zel hian ka chakpui lovang che u tih ka hlau a. Aizawl khawpui Congress hruaitute hian tha thlah hauh lova intihzel chuan kan la dingchhuak em em ang,” tiin Lalsawta chuan National party hi an awm reng dawn a, nghet taka an Congress reng chuan an la sorkar tur thu a sawi.
Tunah chuan hmalam panin hmalam an thlir a ngai tih sawiin Lalsawta chuan, “Hun hlui a liam tawh a, huntharah kan chuang a, hunthar hian mi rilruah pawh thil thar an beisei a ni. Rilru thar nen he hun tharah hian kan pen a ngai a, chu rilru chu i pu ang u. Kan ram tana kan sawi chak leh kan enghelh te hi a thar a ngai a ni. ZPM hian an tittha viau thei a, an intihthat poh leh an aia tha tura kan awm a ngai a ni. ZPM in mipui tana tha an tih theih chuan a lawmawm, an aia thain kan ti dawn a ni,” a ti bawk.
“Keimahniah ziding nihna a awm lo, kan awmnaah zawk ziding nihna a awm,” tia sawiin MPCC President chuan, Congress Party hi National Party an ni a, an ding chhuak leh ngei dawn. Rang taka Party hruai ding leh thei tur hruaitu, an hma lawka party inthlan neih turah an thlan a ngaih thu a sawi a. Duhthlanna fim tak hmang a, party hmasawn zelna tura hruaitu tha ber tur nia an ngaih ngei thlang turin a ngen.