Car hmanga intlansiakna ngaihhlut hlawh ber Formula One (F1)-ah tu sarih lai world champion ni tawh Lewis Hamilton chuan kum 205 atangin Italian team Ferrari a zawm dawn a, a team thar tur chungchang sawiin Briton chuan a naupan lai atanga a lo mangphan tawh thin duhthusam puitlinna tur a nih thu a sawi.
Mihang driver ropui chuan mi thenkhatin a insawn hun tur chu hrethiam lo mah se, a tan chuan insawn hun dik tak a nih thu leh hun remchang dang hmu a, boruak thar a tawng tur chu a hlim takzet thu sawi chungin Ferrari car sen lar vat mai khalh chu naupang a nih laia a tum ber thin a nih thu a tarlang tel.
Briton Hamilton hian F1 title a lak hnuhnun ber chu December 2021 kha a ni tawh a. Kha mi tuma hnehna kha he sport-a driver hlawhtling ber nihtirtu niin grand prix race-a chak tam ber a ni a. Intlansiakah vawi 103 a chak tling tawh bawk.
Karliamta Ningani khan F1 khawvel nghawrnghing dawt tham thuchhuah siamin, kum 2025 atanga intanin Ferrari-ah kum tam zawk daih tur contract ziah a remtih thu a puang a; kartawp Inrinni khan kum 39 mi hian Instagram thutlukna dik a siam nia a hriat thu a sawi.
Kum 2012 tawp rual khan Hamilton hian McLaren chhuahsanin Mercedes a zawm a, kum thar atang chuan British team chhuahsanin Italian team a zawm dawn ta a ni.
A team vawn lai a kalsan tur chungchangah Hamilton tawngchhuakin, “Kum 13 mi lek ka nih lai atanga ka hringnuna hmun lian tak luahtu Mercedes kalsan tura thutlukna siam hi ka nuna thutlukna siam harsa ber a ni,” a tichhuak hial.
A team thar tur Ferrari hian kum 2007 atang khan drivers’ title an la chang leh ta lo vang vang a; khami kum khan Hamilton hian McLaren-ah bul a tan ve chiah a, point khat lekin cham-pion nihna a chang pha lo!
Hamilton hian kum 2008 khan McLaren khalh chungin Formula One world title hmasaber a hlawh-chhuak a, a hnu lama title dang paruk lakte chu Mercedes khalh chunga a lak vek a ni thung.