England chuan Euro 2024 khel tura an inbuatsaihnaah Bosnia Bosnia-Herzegovina leh Iceland te an inkhelh fiampui dawn.
Gareth Southgate-a enkawl England hian June ni 3 khian Newcastle United khelmual St James Park-ah Bosnia-Herzegovina an hmachhawn ang a. Bosnia an hmachhawn atanga ni li hnuah Iceland chu Wembley Stadium-ah an hmachhawn zui ve leh dawn. Iceland an hmachhawn tur hi Euro 2024 hmaa inkhel an hmachhawn hnuhnung ber tur a ni ang.
Euro 2021 ah England hian final an thleng a, Wembley Stadium-ah ngei Italy lakah vanduaiin an champion zo lo. Germany a khelh tur Euro 2024-ah champion ngei tumin tan an khawm mek a. An la champion ve lohna Euro-ah champion chakin an tuihal huam huam a ni ber mai. Three Lions hian Euro 2024-a an match hmasa berah June ni 16 khian Serbia an hmachhawn ang.
Euro 2024 hi June 12, 2024-ah khelh tan a ni dawn a, a thlengtu Germany in Munich khawpuiah Scotland hmachhawnin bul an tan ang. Inelna neih turah England hi champion tura rinkai zual zingah an tel a. Hetihlai hian an inkhelhfiampui tur Bosnia leh Iceland te hian inelna an hmachhawn phak dawn em tih a la chiang lo va, play-off khelh phawt an la mamawh.