Harda, Madhya Pradesh-a Thawhlehnia halpuah leh halmawi siamna hmun kang leh puak zuiah mi pakua an thi a, mi 63 velin hliam an tuar bawk.
Kangmei a chhuah hnuah hian a puah zui nasat avangin a bulhnaia mite an chiai nasa hle.
Hliam tuarte hi damdawi inah dah nghal an ni a, thenkhat chu an dinhmun a tha lo hle niin thuneitu pakhat chuan a sawi.
A puak hi a nat em avangin a bul hnai, Narmadapuram district-a Seoni Malwa vela chengte chuan a nghawr nasa tih an sawi hlawm.
Madhya Pradesh Chief Minister Mohan Yadav chuan thuneitute be nghalin chhiatna thlen dan kimchang hrilh leh thuai turin a ti a. Minister Uday Pratab Singh leh hotu lian dangten Harda hi a pan nghal tih X-ah a tar lang.
Bhopal leh Indore-a medical college-te pawh kang hliam buaipui tura inring tura hriattir nghal an nih thu leh kang thelhna khawl pawh tam zawk tirh an nih thu a tar lang bawk.
Video darhah chuan thil siamna hmun atanga hian meikhu a chhuak nasa hle a. A bul chiah kawnpuiah mi an tlanchhe chum chum a, ring taka a puak thawm hriat tur a awm bawk.
Kang thelhtute an thlen hnu lawkah a kang hi thunun nghal a ni a. “Chhanchhuah hna thawh zui nghal a ni a, National Disaster Response Force (NDRF) pawh koh luh an ni,” tiin District Collector Rishi Garg chuan a sawi.
Hima tlan chhuak thawktu pakhat chuan chhiatna a thlen lai hian a hung chhungah mi 150 vel an awm tih a sawi.