Aizawl: Thawhlehni tlai khan NGO Coordination Committee-ten MZP Pisapui-ah an chairman, Lalhmachhuana, President, Central YMA kaihhruaiin an thukhawm a. India sorkarin India leh Myanmar inrina pin (border fencing) a tum chungchang leh ramri hnaiha chengte inkalpawh theihna, Free Movement Regime (FMR) thiah a tum chungchang an sawi ho.
Thutkhawmah hian Myanmar ram chhungah Zofa unau thahnem tak an chen avangin border fencing leh FMR thiah tum chu Zo hnahthlakte inunauna leh inpumkhatna tichhe thei a nih avangin tha an ti lo va. Mizo hnam thendarh tumnaah ngaiin, FMR hi dan hnuaia siam a nih angin tuna mi ang hian kal pui zel ni se, Border fencing hian ramria chengte tan nasa taka harsatna a siam dawn avang leh Mizo hnam inpumkhatna khawih chhe thei a nih avangin hemi kawnga hmalakna hi tihtawp a nih theih nan hma lak an rel.
Union home ministry-ah NGOCC hmingin memorandum theh luh ni se, Mizoram sorkarah pawh lehkha theh luh bakah border fencing-in a nghawng tur state dangte pawh a tul anga thawhpuia sawm an rel bawk a. A tul huna hmalakna tur an ruahman nghal bawk.
Thutkhawmah hian NGOCC-a tel pawl hrang hrang – CYMA, MUP, MHIP, MZP leh MSU hruaitute an tel.