AZL: Mizoram Tipper Association (Drivers’ & Owners’) District Headquarters, Kolasib chuan nimin khan Kolasib khaw chhung National Highway chhe zual lai an hnawh mam.
MTA member-te hian Khuangpuilam leh Rengtekawn inkar kawng khuar chhe zual laite chu quarry spoil leh lung hmangin an hnawh a ni.
MTA hruaitute chuan hetianga hma an lak chhan hi sorkar emaw, eng party emaw tihmualpho tumna a ni lo tih an sawi a, Kolasib khaw chhunga Khuangpuilam leh Rengtekawn inkar kawng hi lirthei tlan harsa khawpin hmun tam takah a khuar tawh a, hei vang hian lirtheiin a tawrh nasat avangin kawng khuar nasa lutuk hi hun eng emaw chen tal a ziaawm theih beiseiin an hnawh tih an sawi a ni.
MTA Dist Hqrs, Kolasib hruaitute chuan kawng an hnawhna tur lung thawhtute, kawng hnawhna tur an phurhna tura lirthei thawhchhuahpui te chungah lawmthu an sawi a, JCB thawh chhuahpuitute chungah lawmthu an sawi bawk a ni.