Chief Minister Lalduhoma chuan sorkarin hand holding policy a kalpui tur chu central sponsor scheme-te nena kaihkawp tur a nih thu a sawi.
NABARD bultuma Mizoram State Credit Seminar, 2024-2025 buatsaih, MRB Head Office Conference Hall, MINECO-a neih hmanpuitu chief minister chuan Mizoramah NABRAD kaltlanga hmasawnna hnathawh a tam thu leh hmachhawp pawh tam tak a awm chu thil lawmawm tak a nih thu a sawi a. Thlai tharchhuah lam te, thilsiam chhuah lam leh services tha siam thei te tanpui turin hand holding policy an kalpui dawn tih sawiin, “A kalpui turin central sponsor scheme-te nena kaihkawp tur niin, bank-ten mawhphurhna pawimawh tak in chelh dawn a ni,” a ti.
Lalduhoma chuan bana kaih policy kalpui turah a dawngtu tur beneficiary thlan thuah ruling party mi leh sa, hlawhtling lo tur tih chiang rengte an duhsak ngawt dawn lo tih sawiin, “Chung mite vang chuan sorkar policy a lo hlawhchham fo tawh a, bank-te pawhin an hnena loan pek in hreh thin tih kan hria. Tumah duhsak bik leh duh loh bik nei lovin, mipui sorkar kan nih angin, a hlawhtlinpui ngei turte chauh kan thlang dawn a, uluk takin line department-ten an vil zui bawk ang,” tiin, bank-te tan chung mite lo puih chu a nuam tawh dawn tih a sawi.
Chief minister chuan thlai chinna tur short term loan (KCC) chungchang uar zawka mipuite hnena thehdarh tha a tih thu te, PACS neihte mumal leh uar zawka hman tangkai tha a tih thu te, self help group-te tana sum leh pai remchang tam zawk siam tha a tih thu te a sawi bawk.
He hunah hian Agriculture Minister PC Vanlalruata pawhin thu a sawi.
Chief minister leh agriculture minister te hian sorkar scheme kaltlanga pek loan thahnem tak, bank hrang hrangte sanction order chu loan hmutute hnenah an hlan a ni.