Russia-in India hnena S-400 hralhna tur thuthlung a tihfel hnu lawkah China chuan India thenawm leh a hmelma kumhlun, Pakistan hnenah khalhtu ngai lo thlawhna (drone) tha tak, khw awm dan eng ang pawha a danglamna hnuaiah pawh a hman theih, high-end military drone, Wing Loong II an tih chu 48 zet a leitir dawn tih a puang.
Nimin khan he thu hi Beijing-ah an ram thuneitute chuan an sawi a. Wing Loong II hi high-end reconnaissance, strike leh thil dang dangah hman theih a ni a. Chengdu Aircraft Industrial (Group) Company-in an siam a ni a, Unmanned Aerial Vehicle (UAV) pawh he company nen hian sorkar chuan a siam dawn bawk a ni.
China hi Pakistan Army hnena ralthuam hralh tam ber ram an ni a. Ram pahnih hian JF-Thunder an tih, engine pakhat hmang, inpawmchilha hman chi indo thlawhna pawh an siam dun a ni.
China-in Pakistan hnena drone tha chi a hralh tur hi Russia-in S-400 sophisticated missile defence system a hralh tur thu a puan hnu lawka puan a nih avangin titi a tam hle a. India-in hmanrua a leisak tur hi Russian President Vladimir Putin-an kar hmasaa New Delhi a tlawh tum khan inremna an siam a ni.