Aizawl : Pachhunga University College (PUC) hnuaia department pali – English, Mizo, Philosophy leh Education department-te tangtlangin nimin khan social media-in hnam nunphung a nghawng dan zirchianna, ni hnih awh tur ‘International Seminar on Social Media and Tribal Culture : Impact and Intersections’ an buatsaih a. Art & Culture Minister C. Lalsawivunga’n a telpui.
Art & Culture Minister chuan nitin nunphungah social media platform hrang hrang ten bu a khuar thuk thu leh tangkai taka hman a nih theih dan te a sawi a. University leh College pawhin zirna tha zawk kalpuina atan an hmang tangkai hle tih sawiin, kalkhawmte chu khawvel changkang zelah social media chu tribal culture vawnhim kawnga tangkai taka hman thiam tum tur leh nghawng thalo a neih loh nana theihtawp chhuah turin a chah.
PUC chu Mizoram mai ni lo India ram pum ang pawha College tha zinga a tel pha chu chhuanawm a tih thu sawiin, hetiang a nih theihna atan hian zirtirtute leh zirlaite tanrualna bakah social media hrang hrang, a bikin youtube chu zirna leh Zohnahthlak culture chawilar nan tangkai taka an hman thiam vang niin a sawi a. Chhawkhlei Cultural Club siam music video pawhin entu thahnem tak a neih thu sawiin, “social media chak tak hmang hian Global culture-ah kan hnam nihna phochhuak a, a tha lam zawnga kan hnam nun kan chawikan zel hi a ngai a ni”, a ti.
C. Lalsawivunga chuan Mizorama zirna in hrang hrangah National leh International huap seminar changtlung tak tak neih a ni thin chu lawmawm a tih thu sawiin, zirna chuan tawp chin a nei lova inzir belh zel ngai kan nih avangin seminar, workshop leh conference-te kaltlanga hriatna kan inhlan chhawng zel thin hi a hlu hle a ni, a ti a. Thangtharte vanneihna chu zirtirna pangngai bakah tunlai thiamna hmangin khawvel hmun dang dang atanga mithiam tak tak te hnen atanga zirtirna an ngaithla thei chu a nih thu a sawi.
Social media-in tribal culture leh khawtlang nunphunga nghawng a neih dan te zirchian a pawimawhzia hriaa PUC in seminar a buatsaih chu lawmawm a tih thu C Lalsawivunga chuan sawiin, a ngaihhlut thu a sawi bawk.
He seminar-ah hian mithiam hrang hrang – Oxford University, UK atangte, Mauritius atangte, Mumbai leh India ram hmun hrang hrang bakah Mizoram chhunga mithiam tak tak 36 te paper buatsaih an zirho dawn a ni.
Pachhunga University College hi kum 1958 a din niin, A+ Accreditation (CGPA- 3.47) nei mekin, NIRF ranking 2023 ah India ram college tha zingah 34-na a hauh pha a. Ram hectare 122 a zau campus neiin, Undergraduate (UG) zirna department 23, Post Graduate (PG) zirna 5 leh Ph.D zirna 2 an kalpui mek a. Zirlai 3000 vel awm mekin heng zingah hian state dang atanga pantu zirlai 42, ram pawn atanga pantu zirlai 3 bakah Ph.D Scholar 60 an nei mek a. Zirtirtu 118 leh staff 80 an awm mek bawk.