US khawthlang lam, Mississippi state-a in kangah nu leh a fate 6 an kang hlum a, an zingah hian naute kum 1 mi lek pawh a tel.
He thil hi an ram sanaa Inrinni zing (India sanaa nimin khaw var hma)-a thleng kha a ni a, Clinton khawpuia thing in kangah hian pa ber chiah a dam chhuak a. Damdawi inah lak tawh niin mei khu a hip nasat avang leh a kan nasat deuh avangin a ngaihtuahawm hle.
Kangmei chhuah chhan hi hriat a la ni lo va. Tihkan luih lam thil a nih erawh a rinawm loh niin tual chhung thuneitute chuan an sawi a, chanchinbu mite chuan electric kal sual atanga intan niin an ziak bawk.