Ralthuam nena inthuamten Nigeria hmarthlang lam, Kaduna state-a khaw pahnih luhchilha an rûnnaah mi 19 vel an thi.
Inrinni zan tlai tawh takah khan motorcycle-a chuang mi sualte hian Kutemeshi beiin mi 14 an that a, eng emaw zat an hliam a, dawr eng emaw zat an rawk bawk niin Internal Affairs Commissioner Samuel Aruwan chuan thuchhuah a siamah a tar lang.
Hemi ni vek hian motorbike-a chuang silai kengten Kujeni khua an bei bawk a, mi panga an that a, chenna in tam tak an hal a. An khuaa kudam leh biak in pawh an hal tel niin a tar lang.
“Kaduna state sorkar chuan an state chhunga Birnin Gwari-a Kutemeshi khua leh Kajuru-a Kujeni khua chu bandit-ten beiin mi 19 an thah thu leh mi thahnem takin hliam an tawrh thu an sawi,” tiin Aruwan hian a thuchhuahah a tar lang.
Hetih lai hian Kutemeshi-a chengte chuan an khuaah ringawt pawh mi 19 an thah an nih thu an sawi ve thung.
“Min beihnaah hian mi 19 kan chân a, nimin (Pathianni) khan kan vui,” tiin Kutemeshi-a cheng, Ayuba Abdullahi chuan Thawhtanni khan a sawi.
Thla hmasa pawh khan bandit-te hian Birnin Gwari district-a khaw pathum leh an thenawma Katsina state-a khua an rûnnaah mi 12 thatin mi 30 an ru bo tawh.